Atyraýda eki er adam dúkennen 200-den astam buqtyrylǵan et konservisin urlaǵan

Oblystyq polıtsııa departamenti baspasóz qyzmetiniń málimetinshe, eki er adam dúkennen kún saıyn 15-20 et konservisin urlap kelgen.
«Kúdiktiler dúkennen 200-den astam «Kýbleı» buqtyrylǵan et konservisin qoldy etip, 380 myń teńgege jýyq zalal keltirgen. Dúken ıesi taýarlardy sanap, jetkiliksiz ekenine kóz jetkizgen soń beınebaqylaý kamerasyn teksergen. Onda eki er adamnyń et konservilerin sómkege salyp alyp shyqqany túsip qalǵan» -dep habarlady departamenttiń baspasóz qyzmeti.
Polıtsııa qyzmetkerleri urlyqqa qatysty kúdikke ilingen eki er adamdy anyqtady. Onyń biri – buryn sottalǵan 1990 jylǵy azamat, ekinshisi – 26 jastaǵy jigit.
«Qazir 31 jastaǵy er adam ustalyp, ýaqytsha ustaý ızolıatoryna qamaldy. Oǵan qatysty QR Qylmystyq Kodeksiniń 188-babynyń 3-bólimi, 2-tarmaǵymen sotqa deıingi tergeý bastaldy» -dep málim etti baspasóz qyzmetinen.
Al, ekinshi kúdikti izdestirilip jatyr.
Eske sala ketelik, buǵan deıin Atyraýda velosıped urlaǵan jigitke qatysty 11 qylmystyq is tirkelgen bolatyn.