Atyraýda eki aıda salynǵan modýldi ınfektsııalyq aýrýhana ashyldy
ATYRAÝ. QazAqparat – Atyraý qalasynda eki aıda salynǵan modýldi tıptegi ınfektsııalyq aýrýhana paıdalanýǵa berildi, dep habarlaıdy QazAqparat.
Jańa aýrýhana NCOC kompanııasynyń demeýshiligimen boı kótergen. Onda 8 blok pen 10 qosalqy nysan bar. Aýrýhana ǵımaraty Germanııanyń «Modex» zaýytynda shyǵarylǵan modýldik temirbeton bloktardan qurastyrylǵan. Ǵımarattyń jalpy aýmaǵy – 8924 sharshy metr.
Aýrýhanada dıagnostıka men emdeý úshin zamanaý kompıýterlik tomografpen, sandyq rentgen apparatymen, medıtsınalyq gazdar júıesimen, ÝDZ, EKG, ókpeni jasandy jeldetý apparattary jáne basqalarmen qamtylǵan. Medıtsınalyq mekemede qaýipsizdik deńgeıi joǵary aqyldy jeldetý júıesi ornatylǵan. Palatalarda ár tósekte medbıkeni shaqyrý túımesi bar. Oqshaýlanǵan bokstarǵa arnaıy chıpter arqyly ǵana kirýge bolady. Munda jergilikti medıtsına qyzmetkerlerimen qatar Grýzııa respýblıkasynan kelgen dárigerler alty aı boıyna jumys jasaıtyn bolady.
«Eń bastysy, jańa medıtsınalyq mekeme óńirdegi medıtsınalyq kómektiń qoljetimdiligi men sapasyn arttyrýǵa múmkindik beredi», - dedi óńir basshysy Mahambet Dosmuhambetov.
Medıtsınalyq nysanda 56 eki oryndyq, 16 úsh oryndyq, 6 bir oryndyq palata men jeti eki oryndy bokstar aýlaǵa shyǵatyn arnaıy esikterimen jasalǵan.
Oblystyq densaýlyq saqtaý basqarmasynyń basshysy Ashan Baıdýálıevtiń aıtýynsha, joǵary tehnologııalyq medıtsınalyq jabdyqtardy qospaǵanda, jobany iske asyrý kezinde otandyq materıaldar men taýarlardy paıdalanýǵa basymdyq berilgen. Infektsııalyq aýrýhana 200 tósekke eseptelgen. Onyń ishinde 20 oryn jansaqtaý jáne qarqyndy terapııa bólimshesine arnalǵan.
«Patsıentterdi emdeý men dıagnostıkalaýǵa qajetti qural-jabdyqtarmen qamtyldy. PTR zerthanasy, rentgen men kompıýterlik tomografııa kabınetteri ashyldy. Aýrýhana dálizine qaýipti ınfektsııanyń taralmaýy úshin palatalardyń ishinde teris qysym jasaıtyn arnaıy sorý-syrtqa taratý jeldetkishimen jabdyqtaldy. Munda «las» jáne «taza» aımaqtarǵa bólindi. Aýany tereń tazartatyn ORIT súzgi qoraptary ornatyldy.
Aýrýhana aýmaǵynda jedel járdem kólikteri dezınfektsııalaý pýnktine óńdeýden ótkiziledi. Sondaı-aq, medıtsınalyq qaldyqtardy zararsyzdandyrý stantsııasy iske qosyldy. Reanımatsııa men qarqyndy terapııa bólimsheleri membrana arqyly ótken taza sý óndirý jáne búırek jetkiliksizdigi bar patsıentterge arnalǵan dıalız apparattarymen jabdyqtaldy. Palatadaǵy árbir tósek medıtsınalyq gazdar men ottegi jelisine qosyldy», – deıdi basqarma basshysy Ashan Baıdýálıev.
Aýrýhanada emdelýshilerdiń densaýlyq jaǵdaıyna qashyqtyqtan monıtorıng júrgiziletin avtomattandyrylǵan monıtorıng ortalyǵy jasaqtalǵan. Medıtsına qyzmetkerleri emdelýshilerdiń aýrý tarıhyn, saraptamalardy planshetter arqyly almasady.
Modýldi ınfektsııalyq aýrýhananyń jobasyn «Aqmol Project» JShS daıyndaǵan. Al qurylysyn «BI-Industrial» JShS eki aıǵa jeter-jetpes mezgilde, ıaǵnı, 18 tamyz-15 qazan aralyǵynda júrgizgen.
Eske sala ketelik, budan buryn Atyraýda modýldi tıptegi aýrýhana salynyp jatqanyn habarlap edik.
