Atyraýda eki aıaǵynan aıyrylǵan múgedek 8 jyl buryn jasaǵan qylmysy úshin sottaldy

Atyraý oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmetiniń habarlaýynsha, oqıǵa 2010 jyldyń qańtar aıynda bolǵan. Taraz qalasynyń turǵyny Asylbek Kýjanazarov ózi burynnan jaqsy kóretin tanysy Aıdany (aty ózgertilgen) Atyraý qalasyna izdep keledi. Ekeýi kezdesip, birneshe kúnnen keıin A.Kýjanazarov tanysyna ózimen birge Almaty qalasyna baryp turýdy usynady. Alaıda jubaıy men úsh qyzy bar Aıda onyń bul usynysynan bas tartady.

Sóıtip A.Kýjanazarov keri Tarazǵa ketýdi sheshedi. Aıda A.Kýjanazarovty shyǵaryp salý nıetimen temirjol vokzalyna kelip, ol ótinish etkesin araq alyp beredi. Keıin poıyz kelgenshe sol mańdaǵy Konteıner kóshesi boıynda sóılesip otyryp, araqqa masaıǵan A.Kýjanazarov tanysyna renishin bildire bastaıdy. Bir sátte ashýǵa býlyǵyp, óziniń jol sómkesinde jatqan ashana pyshaǵyn alyp, Aıdanyń denesine 19 ret suǵyp, ajal qushtyrady. Onyń es-tússiz kúıin kórgennen keıin, dereý poıyzǵa minip ketip qalady.

Tarazǵa jetkesin araq alyp, aýylyna qaraı jaıaý jol tartady. Jol - jónekeı óz - ózine qol jumsamaq oımen qolynyń tamyryn kesedi. Alaıda qys ortasynda dalada uıyqtap qalyp, qalyp eki aıaǵyn úsirip alady. Keıin  aıaqtary ampýtatsııaǵa ushyraıdy.

Múgedek bolyp qalǵan A.Kýjanazarov segiz jyldan keıin óz erkimen kelip, jasaǵan qylmysyn moıyndaıdy.

«Atalǵan qylmystyq isti Atyraý oblysynyń qylmystyq ister jónindegi mamandandyrylǵan aýdanaralyq sotynda sýdıa Zarema Hamıdýllına qarady. Sot jaza taǵaıyndaý kezinde onyń shyn ókinip kelgenin jáne eki aıaq joq múgedek ekenin eskerip, ony  Qylmystyq kodekstiń 96-babynyń 1-bóligimen 8 jyl merzimge bas bostandyǵynan aıyrý jazasyna kesti. A.Kýjanazarovtyń endigi 8 jyl ýaqyty qatań rejimdegi túzeý kolonııasynda ótetin bolady. Sot úkimi zańdy kúshine endi», dep habarlady Atyraý oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti.