Atyraýda eki aı buryn Jaıyqqa batyp ketken adamdy izdeý qaıta jalǵasty
Oblystyq tótenshe jaǵdaılar departamenti qoǵammen baılanys tobynyń málimetinshe, 16 naýryzda qaıta jalǵasqan izdeý jumysyna 5 qutqarýshy, 1 júzý quraly tartylǵan.
«Bıylǵy 5 qańtarda jergilikti saǵat 11:14 shamasynda Atyraý qalasyndaǵy «Jumysker» shaǵyn aýdany tusynda eki er adam Jaıyq ózeninde qatqan muz astyna túsip ketken. Polıtsııa qyzmetkerleri ózenge batqannyń birin – 49 jastaǵy er adamdy qutqaryp qaldy. Ol oblystyq aýrýhanaǵa jetkizildi. Al, 1975 jylǵy er adamdy qutqarý múmkin bolmady. Ony izdeý jumysy 10 kúnge sozylǵanmen, nátıje bergen joq. Endi ózenge batyp ketken adamdy izdeý qaıta jalǵasty», - dep habarlady departamenttiń qoǵammen baılanys toby.
Kún jylynyp, Jaıyq ózenindegi muz erýine baılanysty batyp ketken adamnyń týystarynyń izdestirý jumystaryn jalǵastyrý jóninde ótinish bergen.
Eske sala ketelik, budan buryn Atyraýda muz oıylyp, Jaıyqqa túsip ketken eki adamnyń bireýi qutqarylǵanyn habarlaǵan bolatynbyz. Keıin Jaıyq ózenine batyp ketken atyraýlyq tabylmaı jatqanyn jazǵan edik.
«Tótenshe jaǵdaılar departamentiniń súńgýirleri 24 ret sý astynan izdeý jumystaryn júrgizdi. Súńgý kezinde jalpy aýdany 450 sharshy metrden astam, 4-8 metr tereńdikte sý asty tekserildi. Alaıda, súńgýirler Jaıyq ózeniniń astynda bógde zattardy kóp kezdestirgen. Ózen sýynyń laılanýyna baılanysty kórý deńgeıi tómendegen. Munyń bári súńýirlerge sý astynan izdestirý júrgizýge qıyndyq týdyryp otyr», - dep málim etken edi qoǵammen baılanys tobynan.