Atyraýda eki aı buryn Jaıyqqa batqan jasóspirimdi izdeý áli jalǵasyp jatyr
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, sý aıdyndarynda shomylýǵa tyıym salynǵan 70 qaýipti ýchaske anyqtalǵan.
«Onyń ishinde Atyraý qalasynda 17, Inder aýdanynda 10, Mahambette – 19, Qurmanǵazyda – 2, Jylyoıda – 7, Qyzylqoǵada aýdanynda 15 qaýipti ýchaske bar. Qaýipti ýchaskelerge 238 tyıym salý belgisi men 9 aqparattyq stend ornatyldy. Biraq soǵan qaramastan, shomylý kezeńi bastalǵan 15 maýsymnan 3 tamyzǵa deıin sý aıdyndarynda 8 adam batyp ketti. Onyń ishinde kámeletke tolmaǵan 2 bala bar. Al ótken aptada taǵy 1 adam shomylý kezinde jantásilim etti», - dep habarlady departamenttiń qoǵammen baılanys toby.
Belgili bolǵandaı 13 maýsymda sýǵa batyp ketken aǵaıyndy jasóspirimniń biri áli tabylmaǵan. Qutqarýshylar ony izdestirýdi jalǵastyryp jatyr.
Bir top jasóspirim Atyraý qalasynyń mańyndaǵy Geolog eldi mekeni tusynda Jaıyq ózenine shomylýǵa barǵan. Jasóspirimder shomylýǵa tyıym salynǵan belgi ornatylǵan tusta sýǵa túsken. Alaıda 2007 jáne 2008 jylǵy aǵaıyndy jasóspirimder Jaıyq ózenine batyp ketken.
«Aǵaıyndy jasóspirimniń biriniń múrdesi 16 maýsymda sýdan shyǵaryldy. Onyń múrdesi sýǵa shomylǵan jerden 20 metr radıýsta, 12 metr tereńdikten tabyldy. Onyń 2008 jylǵy jasóspirim ekeni anyqtaldy», - dep málim etti departamenttiń qoǵammen baılanys tobynan.
Eske sala ketelik, buǵan deıin Atyraýda aǵaıyndy jasóspirimder Jaıyq ózenine batyp ketkenin jazǵan edik.
Keıin biriniń denesi tabylǵanyn habarlaǵan bolatynbyz.
