Atyraýda dzıýdodan Qazaqstan chempıonaty máresine jetti

ATYRAÝ. QazAqparat - Atyraýda dzıýdodan erler jáne áıelder arasyndaǵy Qazaqstan chempıonaty máresine jetti. Tórtinshi jarys kúninde balýandar aralas komandalyq kezdesýde saıysqa tústi, dep habarlaıdy QazAqparat tilshisi.

Jarys barysynda Jetisý oblysynyń balýandary birinshi oryn aldy. Olar fınalda Mańǵystaý oblysynyń sportshylarynan 4:3 esebimen basym tústi.

Eki oblys balýandary arasyndaǵy báseke óte tartysty ótti.

Jetisý oblysynan Іńkár Tólepberoenova (57 keli), Móldir Narynova (70 keli), Kamıla Berliqash (70 keliden joǵary) jeńse, Mańǵystaý oblysynan Asqar Narqulov (73 keli), Rýslan Musaev (90 keli), Nurdáýlet Jarylqapov (90 keliden joǵary) jeńimpaz boldy.

Osylaısha 3:3 esebi tirkeldi.

Qosymsha beldesýde Móldir Narynova óz komandasyna jeńis syılady.

Úshinshi oryn Atyraý jáne Almaty oblysy balýandaryna buıyrdy.

Eske salsaq, budan buryn alǵashqy úsh jarys kúnindegi nátıjeni habarlaǵan bolatynbyz.