Atyraýda dúken ishinde áıeldi óltirip ketken kúdikti izdestirilip jatyr
Atyraý oblystyq polıtsııa departamentiniń baspasóz qyzmetinen málim etkendeı, qylmystyq oqıǵa 19 qazanda tańǵy saǵat 07:45 shamasynda bolǵan.
«Atyraý qalasynyń Órken shaǵyn aýdanynda ornalasqan jeke ıeliktegi turǵyn úı úıdiń sharbaǵyndaǵy dúken ishinde áıel adamdy qylǵyndyryp óltirgen. Áıel adam 1963 jyly týǵan. Osy derekke baılanysty QR Qylmystyq kodeksiniń 99-babynyń 2-bóligimen sotqa deıingi tergeý bastaldy», -dep habarlady departamenttiń baspasóz qyzmetinen.
Adam óltirgen kúdikti áli ustalǵan joq. Qazir polıtsııa qyzmetkerleri adam óltirgen kúdiktini anyqtaý, ustaý úshin jedel izdestirý is-sharasyn júrgizip jatyr. Jedel izdestirýge polıtsııa departamentiniń jeke quramy jumyldyrylǵan.
«Sotqa deıingi tergeý amaldaryn departamenttiń jedel tergeý toby júrgizýdi qolǵa aldy. Sot medıtsınalyq-saraptama taǵaıyndaldy. Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy», -dep málim etti departamenttiń baspasóz qyzmetinen.
Áleýmettik jelide taraǵan aqparatqa qaraǵanda, kúdikti úıden altyn, áshekeı buıymdaryn, aqsha men ózge de zattardy urlap ketken.
Eske sala ketelik, buǵan deıin Atyraýda úsh adamdy atyp óltirip, taǵy bireýin jaraqattaǵan jigittiń isi sotqa jetkenin habarlaǵan bolatynbyz.