Atyraýda Dınara Sádýaqasovanyń shahmat akademııasy ashyldy

ATYRAÝ. QazAqparat - Atyraýda elimiz boıynsha tuńǵysh halyqaralyq grossmeıster, shahmattan birneshe dúrkin álem chempıony, Qazaqstannyń belgili shahmatshysy Dınara Sádýaqasovanyń shahmat akademııasynyń alǵashqy fılıaly ashyldy, dep habarlaıdy QazAqparat tilshisi.

Saltanatty sharaǵa Atyraý oblystyq shahmat federatsııasynyń vıtse-prezıdenti Sabyrbaı Ǵaısın, Mańǵystaý oblysy shahmat federatsııasynyń prezıdenti, Aqtaý qalasynyń qurmetti azamaty Meńdesh Salıhov, Atyraý qalasy ákiminiń orynbasary Ulyqbek Tnalıev, sonymen qatar, oblystyq jastar basqarmasynyń basshysy Rollan Quspan qatysty.

150 adamǵa arnalǵan, aýmaǵy 450 sharshy metr ǵımarattaǵy Shahmat akademııasy Ernııazov kóshesindegi №16 úıdiń tómengi qabatynda ornalasqan. Munda toppen jáne jeke úırenýge arnalǵan arnaıy bólmeler bar. Akademııada shahmatty shetelde biliktiligin arttyrǵan mamandar úıretetin bolady. Sonymen qatar, Dınara da onlaın sabaqtar berip, master-klass ótkizý úshin arnaıy kelip turady.

«Biz barynsha iri, halyqaralyq týrnırler ótkizip turýǵa tyrysamyz. Atyraýlyq balalar úshin biliktilik týrnırlerin ótkizip turýdyń mańyzy zor. Týrnırler týraly ata-analar men balalar aldyn ala bilip otyrýy úshin jyl sońyna deıin biz arnaıy kúntizbe jasaımyz. Taǵy aıta ketetin bir jaǵdaı, munda múmkindigi shekteýli, jetim jáne az qamtylǵan otbasydan shyqqan balalar úshin tegin úırenýge bolady», - dedi Dınara Sádýaqasova.

Sonymen qatar, Akademııanyń ashylý saltanaty aıasynda júlde qory 800 myń teńgelik «Atyrau chess open 2019» týrnıri uıymdastyryldy. Saıysqa 6-72 jas aralyǵyndaǵy 100-ge jýyq shahmatshy qatysty. Oıyn nátıjesi búgin belgili bolady.

Aıta keteıik, Dınara Sádýaqasovanyń Shahmat akademııasyna 4 jastan asqan balalar jáne eresekter jazyla alady. Barlyq aqparat www.atyrau_academyofchess.kz saıtynda ornalasqan, sondaı-aq 8 702 341 51 51 telefon nomeri arqyly da bilýge bolady.