Atyraýda demeýshiler naýqas búldirshinge ottegi apparatyn syıǵa tartty
ATYRAÝ. QazAqparat – Atyraýda demeýshiler naýqas búldirshinge ottegi apparatyn syıǵa tartty. Ottegi apparatyn 5 jylǵa deıin paıdalanýǵa bolady, dep habarlaıdy QazAqparat tilshisi.
Óńirlik kommýnıkatsııalar qyzmetiniń málimetine súıensek, demeýshilik kómektiń uıymdastyrylýyna oblystyq densaýlyq saqtaý basqarmasy uıytqy bolǵan.
Al, 6 jasar Raıana Qubysheva týǵannan ottegi apparatyna táýeldi. Sol sebepten, ata-anasy ony oblystyq balalar aýrýhanasyna jıi ákeledi. Oblystyq densaýlyq saqtaý basqarmasynyń ótinishimen «Artel Injınırıng» kompanııasy Raıa Qubyshevaǵa ottegi apparatyn syıǵa tartty.
Reseı Federatsııasynan shyǵarylǵan ottegi apparatynyń quny – shamamen 500 myń teńge. Ottegi apparatyn 5 jylǵa deıin paıdalanýǵa bolady.
«Bizdiń kompanııa oblystyq densaýlyq basqarmasymen birlesip, qaıyrymdylyq jobalaryn atqaryp keledi. Sondaı maqsatpen ottegi apparatyna muqtaj 6 jasar búldirshinge syı jasadyq. Árıne, mundaı qymbat qurylǵyny alýǵa báriniń jaǵdaıy jetpeıdi. Oǵan qosa, aýrýhanaǵa jıi qatynaý da qıyndyq týdyrady. Osyndaı qaıyrymdylyq sharalaryn aldaǵy ýaqytta taǵy jalǵastyramyz», -deıdi «Artel Injınırıng» kompanııasynyń bólim basshysy Alena Sergeeva.
Eske sala ketelik, buǵan deıin Qazaqstan halqyna qory Atyraý oblysynda 2 sport zaldy jabdyqtap beretinin jazǵan bolatynbyz.
