Atyraýda demalys kúnderi 2 adam sýǵa ketti
ATYRAÝ. QazAqparat – Atyraý oblysynda demalys kúnderi 2 adam sýǵa ketti, dep habarlaıdy QazAqparat.
Oblystyq Tótenshe jaǵdaılar departamenti baspasóz qyzmetiniń habarlaýynsha, keshe, 21 maýsymda 2 qaıǵyly oqıǵa tirkelgen.
«21 maýsymda Jedel qutqarý jasaǵynyń qyzmetkerleri tańerteńgi saǵat 8:30-dan Mahambet aýdanynyń Aqtoǵaı aýyldyq okrýginde Jaıyq ózenine batqan 31 jastaǵy er adamdy izdedi. «Kazvodhoz» RMK Atyraý fılıalynyń sorǵy stantsııasynda mashınıst bolyp jumys istegen ol 20 maýsymda saǵat 19:00-de arnaıy jabdyqtalmaǵan jerde shomylý kezinde sýǵa batyp ketken. Ekinshi oqıǵa Talǵaırań aýylynda boldy. Munda 20 jastaǵy jigit saǵat 16:10 shamasynda Jaıyq ózenine sýǵa batqan» -dep habarlady baspasóz qyzmeti.
Keshe sýǵa ketkenderdiń denesi tabylyp, shyǵarylǵan.
Buǵan deıin Atyraýda sýǵa ketken jigittiń denesi úsh kúnnen soń tabyldy.
