Atyraýda daryndy oqýshylarǵa arnap túsirilgen klıp tanystyryldy
Oblys ákimi Serik Shápkenov halyqaralyq, respýblıkalyq olımpıada men konkýrstardyń júldeger oqýshylarymen kezdesip, olardy jetistikterimen quttyqtady.
«Daryndy balalar – bizdiń bolashaǵymyz. Ár bala sapaly biliminiń nátıjesinde jetistikke jetip otyr. Árıne, jetistikke jetý ońaı emes. Bilim – ınemen qudyq qazǵandaı.
Halqymyzdyń «Bilekti birdi jyǵar, bilimdi myńdy jyǵar» degen jaqsy sózin ár kez este ustaý qajet. Bul – básekege qabiletti ultpyz degen sóz. Alǵa qoıǵan maqsatqa jetý úshin talpynyp, tek Atyraýdyń ǵana emes, eldiń maqtanyshy bolatyndaı bıikke umtylý kerek», -dedi Serik Shápkenov.
Oblys ákimi 2022-2023 oqý jylynda halyqaralyq ǵylymı joba jarystary pánaralyq olımpıadalarǵa qatysyp, jeńimpaz atanǵan oqýshylarǵa Alǵys hat tabystap, olardy aqshalaı syılyqpen marapattady.
Forýmǵa qatysqan oqýshylar oblys ákimine ózderin qyzyqtyrǵan suraqtaryn qoıdy.
Budan soń daryndy oqýshylardyń qatysýymen «Atyraý daryndary» ánine túsirilgen beıneklıp tanystyryldy.
Oblystyq bilim basqarmasynyń málimetinshe, sońǵy úsh jylda pánder olımpıadasyna qatysqan atyraýlyq oqýshylar jetistigimen úzdik úshtikten kóringen. Naqtyraq aıtqanda, 2021 jyly 42 medalmen 3-oryn ıelenip, 2022 jyly 55 medalmen taǵy da 3-orynǵa ıe bolǵan.
Al, bıyl 35 medal ıelenip, jaratylystaný-matematıka baǵytynda 2-oryndy ıelengen.
Eske sala ketelik, buǵan deıin atyraýlyq oqýshylar bıleıtin robot qurastyrǵanyn habarlaǵan bolatynbyz.
Atyraýdaǵy Abaı ortalyǵynda 7-11 synyp oqýshylary úshin tegin STEAM kýrsy bar.
Munda mektep oqýshylary túrli robottar qurastyryp, ǵylymı jobalarmen aınalysady.
Máselen, JasSpace keńistiginde qosymsha bilim alyp júrgen Qurmet Áıipqalıev pen Dámeli Kishibaı bıleıtin robot qurastyrǵan. Qurmet munaıly shahardaǵy №28 mekteptiń 7-synybynda, al Dámeli APEC kolledjiniń 1-kýrsynda oqıdy.
