Atyraýda dárigerlerge dórekilik kórsetken sheteldik jazalanýy múmkin
ATYRAÝ. QazAqparat – Atyraýda «Dına» bazaryndaǵy vaktsınalaý beketinde dárigerlerge dóreki minez kórsetken sheteldik jazalanýy múmkin, dep habarlaıdy QazAqparat.
Oblystyq densaýlyq saqtaý basqarmasy baspasóz qyzmetiniń málimetinshe, № 3 qalalyq emhananyń ákimshiligi vaktsınalaý beketiniń medqyzmetkerlerin qorlaǵany úshin, sondaı-aq, vaktsınanyń jaǵymsyz áseri týraly jala japqany úshin polıtsııaǵa aryz jazǵan.
«Quqyq buzýshynyń áreketi zańsyz dep sanaımyn. Qazir tek bizdiń elimiz ǵana emes, álem jurtshylyǵy koronavırýs ınfektsııasyna qarsy kúres júrgizýde. Óıtkeni, qaýipti ınfektsııany toqtaýdyń jalǵyz joly – vaktsına alý. Sondyqtan, biz – dárigerler turǵyndar arasynda vaktsınanyń janama áseri týraly jalǵan aqparattyń taralýymen kelispeımiz. Mundaı jalǵan aqparatty taratýshylar jazalanýy kerek» - dedi Atyraý qalalyq № 3 emhanasynyń dırektory Aıman Ótegenova.
Onyń aıtýynsha, barsha qazaqstandyq óziniń densaýlyǵyn, aǵaıyn-týysy men áriptesterin qaýipti vırýstan qorǵaýdyń mańyzdy ekenin túsinýi tıis.
Eske sala ketelik, buǵan deıin Atyraýda dárigerlerge dóreki minez kórsetken sheteldikke qatysty túsinik berilgenin habarlaǵan bolatynbyz.
