Atyraýda dárigerlerge dóreki minez kórsetken sheteldikke qatysty túsinik berildi

ATYRAÝ. QazAqparat – Atyraýdaǵy «Dına» bazaryndaǵy bekette vaktsına alý kezinde dárigerlerge dórekilik tanytqan sheteldikke qatysty túsinik berildi, dep habarlaıdy QazAqparat.

Oblystyq densaýlyq saqtaý basqarmasy baspasóz qyzmetinen málim etkendeı, Ózbekstan Respýblıkasynyń 1998 jyly týǵan azamaty bıylǵy 16 maýsymda «Spýtnık V» vaktsınasynyń I komponentin ektirgen.

Sodan keıin jigitte janama áserler men asqynýlar tirkelmegen.

«Bul azamat 14 shildede jergilikti ýaqytpen saǵat 15:00-de vaktsınanyń ІІ komponentin saldyrǵan. Alaıda, vaktsınany alǵanǵa deıin kezekte turǵan sheteldik azamat medıtsına qyzmetkerlerine dórekilik tanytqan. Vaktsınanyń janama áseri týraly arandatý maqsatynda beınejazba túsiremin dep qorqytqan. Demalys bólmesinde 30 mınýttaı ýaqyt bolyp, úıge jiberildi» - dep habarlady oblystyq densaýlyq saqtaý basqarmasynyń baspasóz qyzmeti.

Belgili bolǵandaı, keshe, 14 shildede jergilikti ýaqytpen 18:30-da «Dına» bazarynan jedel járdem qyzmetine qońyraý túsken.

Onda dıspetcherge vaktsınatsııadan keıin bir adam aýyryp, qurysý belgileri baıqalǵany habarlanǵan.

«Jedel járdem úsh saǵat buryn vaktsına alǵan jáne dárigerlerge dórekilik tanytqan Ózbekstan azamatyna shaqyrylǵany belgili boldy. Sheteldik jigit oblystyq aýrýhananyń qabyldaý bólimine jetkizildi. Ol 30 mınýttan keıin úıine jiberildi. Sebebi, onyń jaǵdaıy turaqty, aýrýhanaǵa jatqyzýǵa naqty dáıek bolǵan joq. Osyǵan baılanysty turǵyndardan arandatýshylyqqa den qoımaı, tek resmı aqparatqa senýdi suraımyz», -dep málim etti basqarmanyń baspasóz qyzmetinen.

Eske sala ketelik, budan buryn Atyraý oblysynda 121 myńnan astam vaktsına alǵan edi.