Atyraýda dárigerler turǵyndardy jurt kóp jınalatyn oryndarǵa barmaýǵa shaqyrýda
ATYRAÝ. QazAqparat - Atyraýda dárigerler menıngokokk ınfektsııasynyń qaýpi týraly eskertý jasady, dep habarlaıdy QazAqparat tilshisi.
«Almatyda halyq arasynda menıngokokk ınfektsııasynyń juǵýy jıileýine baılanysty Atyraý oblystyq densaýlyq saqtaý basqarmasy jergilikti turǵyndardy saqtandyrýda. Aýrýdyń alǵashqy sımptomdary, mysaly, bas aýrýy, tamaq aýrýy, mazasyzdyq, bórtpe paıda bolsa, jedel járdem shaqyryńyz nemese jergilikti dárigerge habarlasyńyz», - dep eskertedi.
Qazirgi ýaqytta barlyq emhanalar kún saıyn tańǵy 8.00-den 20.00-ge deıin jumys isteıdi.
«Ózińizdi gıpotermııadan qorǵańyz. Kópshilik jınalatyn jabyq ǵımarattaǵy mádenı is-sharalarǵa, sporttyq jarystarǵa qatysýǵa, basseınge túsýge shekteý qoıýdy suraımyz. Al, qulshylyq maqsatynda meshitke barǵan ýaqytta medıtsınalyq maska kıip, jeke gıgıenany qadaǵalańyz. Shetelge shyǵatyn bolsańyz, mindetti túrde vaktsına alyńyz», - dep keńes beredi dárigerler.
