Atyraýda dalaǵa tógilgen katalızatorǵa uqsas qaldyqtar jartylaı kómilgen
Atyraý oblysy boıynsha ekologııa departamentiniń baspasóz qyzmetinen málim etkendeı, munaıly shahar aýmaǵyna zııandy qaldyqtardy zańsyz tógý deregine monıtorıng júrgizilgen.
«Atyraý oblysynyń mamandandyrylǵan tabıǵat qorǵaý prokýratýrasymen birge qorshaǵan ortany qorǵaý zańnamasynyń saqtalýyna turaqty baqylaý júrgizilip keledi. Zańsyz qaldyqtarǵa qatysty monıtorıng nátıjesinde Atyraý qalasynyń syrt jaǵynda ashyq alańǵa qaýipti qaldyqtar qataryna jatqyzylǵan paıdalanylǵan katalızatorǵa uqsas qaldyqtar tógilgeni anyqtaldy. Qaldyqtar shamamen 2000 sharshy metr jerge jartylaı kómilgen. Katalızator «Atyraý munaı óńdeý zaýyty» JShS-niń munaıdy tereń óńdeý óndirisinde paıdalanylatyn qospa ekeni belgili. «Atmosferalyq aýany qorǵaý respýblıkalyq ǵylymı-zertteý ortalyǵy» JShS Atyraý qalasyndaǵy fılıalynyń júrgizgen zerthanalyq taldaý qorytyndysymen dalaǵa tógilgen qaldyqtardyń quramynda nıkeldiń biraz mólsheri bar ekeni anyqtaldy. «Greıs Kazahstan Katalısts» JShS-niń «Atyraý munaı óńdeý zaýyty» JShS-ne usynǵan anyqtamasyna sáıkes, paıdalanylǵan katalızor quramyndaǵy nıkel ólshemi 5000 ppm quraǵan», -dep habarlady departamenttiń baspasóz qyzmeti.
Qazir ekologtar men Atyraý oblysynyń tabıǵat qorǵaý prokýratýrasynyń qyzmetkerleri qaýipti qaldyqty tókken mekemeni anyqtaý úshin tıisti jumystar júrgizip jatyr.
Eske sala ketelik, budan buryn Atyraý oblysynda munaıǵa uqsas suıyqtyq tógilgen jer tabylǵanyn, keıin munaıǵa uqsas suıyqtyq aǵyp jatqan aýmaq qorshalǵanyn habarlaǵan edik.
Sondaı-aq, Atyraý oblysynda dalaǵa taǵy da las sý tógilip jatqanyn, ekologtar sý men topyraqtan synama alǵanyn jazǵan bolatynbyz.
Foto: Atyraý oblystyq ekologııa departamenti