Atyraýda bıýdjet qarajatyn jymqyrǵan kásiporyn qyzmetkeri sottaldy

ATYRAÝ OBLYSY. QazAqparat –Atyraý oblysynda kásiporyn dırektorynyń orynbasary 4,7 mln teńge somasynda bıýdjet qarajatyn jymqyrǵany úshin sottaldy. Bul týraly QazAqparat Qarjy monıtorıngi komıtetine silteme jasap habarlaıdy.

Komıtettiń Atyraý oblysy boıynsha Ekonomıkalyq tergeý departamenti JShS dırektorynyń orynbasaryna qatysty QR QK-niń 189-b. 3-b. 1-tarmaǵy boıynsha (Senip tapsyrylǵan bóten múlikti ıemdenip alý nemese talan-tarajǵa salý) qylmystyq isti tergep-tekserý aıaqtaldy.

Atalmysh tulǵa óz qyzmettik babyn paıdalanyp, «Inder kópbeıindi aýyl sharýashylyǵy kolledji» KMQK-nyń oqý ǵımaratyn kúrdeli jóndeýge bólingen 4,7 mln.teńge somasyndaǵy bıýdjettik qarajatty jymqyrǵan.

Kúdiktiniń kinási sotqa deıingi tergep-tekserý barysynda jınaqtalǵan dáleldemelermen dáleldenip, keltirilgen shyǵyn sommasy Atyraý oblysynyń Sot saraptamasy ınstıtýtymen rastaldy.

Inder aýdandyq sotynyń úkimimen kásiporyn dırektorynyń orynbasary kináli dep tanylyp, oǵan 3 (úsh) jyl 6 (alty) aı merzimge bas bostandyǵyn shekteý jazasy taǵaıyndaldy.

Eger Sizde bıýdjet qarjysyn maqsatsyz jumsaý, jymqyrý derekteri týraly aqparat bolǵan jaǵdaıda, Komıtettiń – 8 [phone], Atyraý oblysy boıynsha ETD – 8 [phone] senim telefondary arqyly habarlasyńyz.