Atyraýda bıýdjet qarajatyn jymqyrǵan fılarmonııa dırektory sottaldy

ATYRAÝ. QazAqparat - Atyraý oblysy mádenıet salasynyń birqatar laýazymdy tulǵalary asa iri kólemde bıýdjet qarajatyn jymqyrǵany úshin sottaldy, dep habarlaıdy QazAqparat Sybaılas jemqorlyqqa qarsy qyzmetke silteme jasap.

Atyraý oblysy boıynsha Sybaılas jemqorlyqqa qarsy qyzmeti osyǵan deıin Atyraý oblysynyń Mádenıet, muraǵattar jáne qujattama basqarmasynyń burynǵy basshysy S. Sabyrǵa, N. Jantórın atyndaǵy Atyraý oblystyq fılarmonııasynyń burynǵy dırektory Ǵ. Dúısenǵalıevke, basqarmanyń býhgalterlik esep, eseptilik jáne qarjy-ekonomıkalyq qyzmet bóliminiń burynǵy basshysy A.Rahmatýlınaǵa jáne burynǵy býhgalter G.Samarıdenovaǵa qatysty sotqa deıingi tergeýdi aıaqtady.

«Sabyr jáne basqalar laýazymyn asyra paıdalaný jáne mádenı-kópshilik is-sharalar ótkizý syltaýymen úlestes tulǵalar arqyly qolma-qol aqshaǵa aýdarý arqyly senip tapsyrylǵan bıýdjet qarajatyn asa iri kólemde jymqyrý boıynsha kúdikti dep tanyldy. 16 naýryzda Atyraý qalalyq №2 sotynyń úkimimen Sabyr 7 jylǵa sottaldy, Dúısenǵalıevtiń 7 jylǵa bas bostandyǵy shekteldi. Samarıdenova men Rahmatýlına jazany óteýdi 5 jylǵa deıin keıinge qaldyrtyn boldy. Olar 7 jylǵa bas bostandyǵynan aıryldy» delingen habarlamada.

Sottalǵan laýazymdy tulǵalar memlekettik qyzmette laýazym atqarý quqyǵynan ómir boıyna aıyryldy.