Atyraýda byltyrdan beri 3 mektepti kúrdeli jóndeý baıaý júrip jatyr
Oblys ákimi Serik Shápkenovtiń tóraǵalyǵymen ótken jıynda bilim berý nysandaryn kúrdeli jóndeý, mektepterdiń qurylysy men oqý ordalaryndaǵy qaýipsizdik máselesi qaraldy. Oblystyq bilim berý basqarmasy basshysynyń orynbasary Tilekqabyl Baıdoshevtyń málimetinshe, 10 mektepte kúrdeli jóndeý júrip jatyr.
«Byltyr 6 mektepke kúrdeli jóndeý jumystary júrgizýge 2 mlrd 145 mln teńge qaraldy. Onyń úsheýiniń jóndeý jumystary áli kúnge aıaqtalǵan joq. Al, bıyl 8 mektep, 1 balabaqsha men «Barys» klýby kúrdeli jóndeýden ótedi», - dedi Tilekqabyl Baıdoshev.
Serik Shápkenovtiń pikirinshe, mektepterdegi kúrdeli jóndeýdi keshiktirgen merdigerdiń jumysyna taldaý júrgizilýi qajet. Jumysty durys atqarmaıtyn merdigerlerdi josyqsyz dep taný máselesin qarastyrý kerek.
«Mektepterdi jóndeýge bólingen bıýdjettiń qarajaty qaıda ketip jatyr? Muny oblystyq prokýratýra anyqtaýy qajet. Jumsalǵan ár tıynnyń esebi bolýy tıis. Qurylysy sozylǵan nysan bıýdjetke salmaq salady. Sondyqtan, túrli syltaý qabyldanbaıdy. Eger merdiger men jobalaýshy mekemeniń, ne bilim basqarmasynyń kinási bolsa, olarǵa shara qoldaný kerek», -dedi Serik Shápkenov.
Oblystyq qurylys basqarmasynyń basshysy Nurbergen Qusaıynovtyń aıtýynsha, 37 mektep salý josparlanǵan. Qazir 5 mektep paıdalanýǵa berilgen. Endi basqarmanyń tapsyrysymen 7270 oryndyq 15 mekteptiń, al, 4000 oryndyq 2 mekteptiń qurylysy memleket-jekemenshik áriptestigi aıasynda júrip jatyr. Mektepterdiń qalǵany «Jaıly mektep» baǵdarlamasymen boı kóteredi.
Eske sala ketelik, buǵan deıin «Jaıly mektep» jobasymen Atyraý oblysyndaǵy Saǵyz aýylynda jańa bilim ordasy salynatynyn jazǵan edik.
