Atyraýda burynǵy áıelin uryp, belgisiz baǵytqa áketken er adam ustaldy

ATYRAÝ. QazAqparat – Atyraýda destrýktıvti dinı aǵymnyń ókili burynǵy áıelin uryp, polıtsııaǵa qarsylyq kórsetken. Qazir onyń ústinen sotqa deıingi tergeý júrip jatyr, habarlaıdy QazAqparat tilshisi.

Atyraý oblystyq polıtsııa departamentiniń baspasóz qyzmetinen málim etkendeı, er adam áıeldi uryp-soǵyp, kólikke súırep mingizip alyp ketken. Áıel kómek suraǵan.

Bul týraly oqıǵanyń kýágerleri 102 jelisiniń operatoryna habar bergen.

«Polıtsııa qyzmetkerleri jedel-izdestirý is-sharasyn júrgizip, kúdikke ilingen Honda avtokóligin Atyraý-Qarabatan tasjolynan anyqtap, toqtatty. Kóliktiń rýlinde bolǵan 1987 jylǵy júrgizýshi polıtsııa qyzmetkerlerine qarsylyq tanytyp, zańdy talabyna baǵynbaǵan. Al 1988 jylǵy áıel burynǵy kúıeýiniń ózin uryp-soǵyp, dene jaraqatyn salǵanyn, erkinen tys kólikpen belgisiz baǵytqa alyp bara jatqanyn málimdedi. Tekserý kezinde kólik júrgizýshisiniń buryn sotty bolǵany, destrýktıvti dinı aǵym ókili ekeni anyqtaldy», -dep habarlady departamenttiń baspasóz qyzmeti.

Áıelden zorlyq-zambylyq belgileri anyqtalǵan. Sot sheshimimen 1987 jylǵy júrgizýshi QR Ákimshilik quqyq buzýshylyq týraly kodeksiniń 73-2 babymen kináli dep tabyldy. Ol 2 táýlikke ákimshilik qamaýǵa alyndy.

«Buryn dál osyndaı quqyq buzýshylyqty tórt márte jasaǵan er adam budan bylaı polıtsııanyń baqylaýynda bolady. Sondaı-aq, er adamǵa qatysty QR Qylmystyq kodeksiniń 378-babynyń 2 bóligimen (Bılik ókilin qorlaý) sotqa deıingi tergeý júrgizilip jatyr», -dep málim etti departamenttiń baspasóz qyzmeti.

Eske sala ketelik, buǵan deıin Atyraýda daǵdarys ortalyǵyna jyl basynan 24 áıel men 63 bala túskenin habarlaǵan edik.