Atyraýda brakonerlik deregimen 1500 is qozǵaldy
Oblys ákimi Mahambet Dosmuhambetov «balyq sharýashylyǵy salasyn damytý – basty mindettiń biri» dep sanaıdy. Osyǵan oraı balyq sharýashylyǵy basqarmasyna arnaıy tapsyrma berip, ásirese, brakonerlikpen kúres sharasyna basa nazar aýdardy. Óıtkeni balyq sharýashylyǵyn salany damytý úshin brakonerlikpen kúres mańyzdy ról atqarady.
«Byltyr brakonerlik deregi boıynsha 1500-ge jýyq ákimshilik jáne qylmystyq is kóterildi. Sot arqyly 287 adam jaýapkershilikke tartyldy», - dedi oblys ákimi Mahambet Dosmuhambetov.
Balyq qoryn kóbeıtý úshin byltyr Jaıyq ózenine 7,5 mln bekire tuqymdas balyqtardyń shabaǵy jiberildi. Sondaı-aq, ótken jyly óńirde 15 464 tonna balyq aýlaýǵa kvota bólindi. Kvotany ıgerý kólemi 84,7 paıyzǵa oryndaldy. Endi bıyl bul kórsetkishti 95 paıyzǵa jetkizý josparlanyp otyr.