Atyraýda brakonerlerge qoldaý kórsetken eki ınspektor ustalǵan
Sybaılas jemqorlyqqa qarsy is-qımyl agenttigi oblystyq departamentiniń qyzmetkerleri ınpsektordyń bireýin Jaıyq ózeniniń jaǵasynda Damba aýylynda eki balyqshymen birge ustaǵan. Olar otyrǵan qaıyqta teńizden zańsyz aýlanǵan 50 keli balyq bolǵan. Ekinshi ınspektordyń úıin tintý kezinde qyzyl balyqtyń bir bóligi tárkilengen.
Osyǵan oraı Balyq sharýashylyǵy komıteti pikir bildirdi.
«Balyq sharýashylyǵy komıtetiniń tapsyrmasy boıynsha aýmaqtyq bólimshelerdiń ınspektorlyq quramy arasynda sybaılas jemqorlyq pen quqyq buzýshylyqtarǵa jol bergeni úshin qylmystyq jaýapkershilik týraly eskertý men túsindirý jumysyn júrgizdi. Aýmaqtyq bólimshelerdiń basshylaryna sybaılas jemqorlyq kórinisteriniń aldyn alý boıynsha is-sharalar josparlary aıasynda qoıylǵan mindetter men belgilengen sharalardy iske asyrýdy kúsheıtý tapsyryldy. Sondaı-aq, ınspektsııalardaǵy sybaılas jemqorlyqqa qarsy is-qımyl, júrgizilip jatqan jumystyń ashyqtyǵyn qamtamasyz etý máseleleri erekshe baqylaýda», - dep habarlady komıtettiń baspasóz qyzmeti.
Eske sala ketelik, budan buryn Atyraýda Kaspıı jaǵasynan brakonerlerdiń «qonysy» tabylǵanyn jazǵan edik.
