Atyraýda brakonerlerden bekire men esirtki tárkilendi
Oblystyq polıtsııa departamentiniń baspasóz qyzmetinen málim etkendeı, úsh kúdiktiniń esirtki ónimderi men bekire tuqymdas balyqtardy zańsyz saqtaǵany anyqtaldy.
«Ekstremızmge qarsy is-qımyl basqarmasy men Atyraý qalalyq polıtsııa basqarmasynyń №1 qalalyq bóliminiń qyzmetkerleri «Brakoner» jedel-profılaktıkalyq is-sharasy kezinde úsh er adamdy anyqtap, ustady. Olardyń birine tıesili kólik garajyn tintý kezinde salmaǵy 101 keli qara balyq, 20 keli bekire tuqymdas balyqtar túrleri, 7 dana kóleminde esirtkige uqsas zattar tabyldy. Budan bólek, kúdiktiderdiń taǵy biriniń garajynan 5 dana motorly qaıyq pen tirkelmegen 16 kalıbrli eki uńǵyly myltyq tabylyp, tárkilendi», - dep habarlady departamenttiń baspasóz qyzmeti.
Qazir aıǵaqty zattarmen ustalǵan úsh kúdiktige qatysty QR Qylmystyq kodeksiniń 339-baby 1-bóligimen, 296-baby 2-bóligimen sotqa deıingi tergeý amaldary júrgizilip jatyr.
Kúdiktilerdiń jasy – 46, 41 jáne 38-de. Olarǵa bultartpaý sharasyn qoldaný máselesi sheshilip jatyr.
Eske sala ketelik, budan buryn Atyraý oblysynda brakonerlerden 2,5 tonna balyq tárkilengenin habarlaǵan bolatynbyz.
Kúzgi «Bekire-2022» is-sharasy kezinde Balyq qoryna zańsyz qol suqqan 154 quqyq buzýshy ustalyp, olardan 2 tonna 538 keli balyq tárkilendi. Onyń ishinde 438 keli bekire tuqymdas balyqtar bar. Quqyq buzýshylardan 153 balyq aýlaý jáne 3 sý kólik quraldary alyndy. QR Ákimshilik quqyq buzýshylyq týraly kodeksiniń 383-babymen (Balyq aýlaý qaǵıdalaryn buzý) 143 adam jaýapkershilikke tartyldy.
