Atyraýda brakonerlerden 64 tonna balyq, 118 júzý quraly tárkilengen
ATYRAÝ. QazAqparat - Atyraý oblysynda 2017 jyly brakonerlerden 64 tonnadan astam balyq, 118 júzý quraly tárkilengen. Bul týraly Atyraý oblystyq ákimdiginde ótken quqyq buzýshylyqtyń aldyn alý jónindegi vedomstvoaralyq komıssııanyń otyrysynda aıtyldy, dep habarlaıdy óńir basshysynyń resmı saıty .
Oblys ákimi Nurlan Noǵaevtyń tóraǵalyǵymen ótken jınalysqa barlyq quqyq qorǵaý jáne qadaǵalaý organdary men quzyrly memlekettik qurylymdardyń basshylary qatysty. Kún tártibindegi máselelerdiń birin qaraý barysynda aımaq basshysy brakonerlikpen kúres boıynsha atqarylǵan jumystar týraly esepti tyńdady.
«Bekire-2017» tabıǵat qorǵaý aktsııasy kezinde 826 zań buzýshy ákimshilik jaýapkershilikke tartyldy, 21 is boıynsha sot sheshimi shyqty. Balyq qorǵaý zańnamasyn buzǵandarǵa 13 mln teńge ákimshilik aıyppul salyndy. Balyq qoryna zalal keltirgeni úshin balyq qorǵaý zańnamasyn buzǵandarǵa 2 mln 230 myń teńge kóleminde qýynym berildi. 64 tonna balyq tárkilendi, onyń 3 tonna 126 kelisi bekire tuqymdas jáne 11 keli ýyldyryq. Zańsyz aınalymnan 118 júzý quraly men 42 avtomotokólik shyǵaryldy.
Nurlan Noǵaev barlyq deńgeıdegi memlekettik organ qyzmetkerleri turǵyndarmen túsindirý jumystaryn júrgizý kerektigin atap ótti. Jınalysta turǵyndardyń zańsyz balyq aýlaýmen aınalysýlaryna sebep joqtyǵy da aıtyldy. Aımaqta ár túrli salada laıyqty jumys tabýǵa qajet jaǵdaıdyń bári jasalýda.
Oblys ákimi orynbasarlaryna naqty tapsyrmalar berdi.
"Az jumys istelgen joq, biz biraz oń kórsetkishterge qol jetkizdik, biraq áli de qyzmetimizdi kúsheıtýimiz kerek,- dedi Nurlan Noǵaev. - Brakonerlik - bizdiń qoǵamnyń azǵyndyǵy, onyń tamyryna balta shabýymyz kerek, ol úshin memlekettik organdar ózara árekette jumylyp jumys isteýi tıis. Balyq aýlaýmen zańdy túrde aınalysqysy keletin balyqshylar salyq organynda jeke kásipker retinde tirkelip, balyq tapsyratyn óndiristik kooperatıvtermen resmı kelisimshartqa otyrýlary kerek. Bári ashyq, aıqyn bolýy qajet".
