Atyraýda brakonerlerden 2 tonnaǵa jýyq balyq tárkilendi
ATYRAÝ. QazAqparat – Atyraýda jyl basynan beri brakonerlerden 1 tonna 712 keli balyq tárkilendi, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetinshe, Jaıyq ózeni men Kaspıı teńizinde muz qatqaly beri birneshe ret reıdtik is-shara ótkizilgen. Maqsat – balyq qoryna zańsyz qol suǵýshylardy anyqtaý.
«Polıtsııa qyzmetkerleri reıdtik sharalar kezinde brakonerlerden 1 tonna 712 keli qara balyq taýyp, tárkiledi. Zańsyz balyq aýlaýshylardan 20 mototsıkl men 2 avtokólik alyndy. Qazir quqyq buzýshylarǵa qatysty sotqa deıingi tergeý júrgizilip jatyr» dep habarlady departamenttiń baspasóz qyzmeti.
Sondaı-aq, «Chevrolet NIVA» qyzmettik avtokóligi toqtatylyp, zańsyz aýlanǵan 300 keli sazan tárkilengen. Kólik arnaıy aıyp turaǵyna qoıylǵan.
Eske sala ketelik, budan buryn Atyraýda balyq qorǵaý zańnamasyn buzǵandarǵa 20 mln teńgeden astam aıyppul salynǵanyn jazǵan bolatynbyz.
