Atyraýda bótenniń kóligin aıdap ketken mas er adam qamaýǵa alyndy
ATYRAÝ. QazAqparat – Atyraýda Atyraýda bótenniń kóligin aıdap ketken mas er adam qamaýǵa alyndy, dep habarlaıdy QazAqparat.
Oblystyq Polıtsııa departamenti baspasóz qyzmetiniń málimetinshe, mas er adam túnde bireýdiń aýlasynda turǵan «Toyota Ipsum» avtokóligin zańsyz aıdap ketken.
«Atyraý qalasynyń 48 jastaǵy turǵyny kóliginiń urlanǵanyn kelesi kúni bilip, polıtsııa qyzmetkerlerine shaǵymdandy. Tártip saqshylary oqıǵa ornyna jedel jetip, 3 saǵattyń ishinde beınebaqylaý kameralarynyń kómegimen kúdiktini izdep tapty. Mas kúıde bolǵan 34 jastaǵy turǵyn zańsyz áreketke barǵanyn moıyndady» -dep habarlady departamenttiń baspasóz qyzmeti.
Qazir atalǵan derekke qatysty QR Qylmystyq kodeksiniń 200-babynyń 1-bóligimen (Avtokólikti zańsyz aıdap ketý) sotqa deıingi tergeý júrgizilýde. Bótenniń kóligin urlaǵan er adam ýaqytsha ustaý ızolıatoryna qamaldy.
Eske sala ketelik, buǵan deıin Atyraýda kólik urlaǵan jasóspirim ustalǵanyn jazǵan bolatynbyz.
