Atyraýda bıznesin jańa bastaǵan kásipkerler úshin basym baǵyttar anyqtaldy
ATYRAÝ. QazAqparat - Atyraý oblysynyń ákimi Nurlan Noǵaev Maxambet aýdanynda shaǵyn jáne orta bıznesti damytý jóninde kóshpeli otyrys ótkizdi, dep xabarlaıdy óńirlik kommýnıkatsııalar qyzmeti.
Jıynǵa QR Ulttyq kásipkerler palatasy basqarmasynyń tóraǵasy Abylaı Myrzaxmetov qatysty. Kásipkerlik jáne ındýstrıaldyq-ınnovatsııalyq damý basqarmasynyń basshysy Aıqyn Eleýsizovtyń aıtýynsha, óńirde atqarylǵan sharalar nátıjesinde shaǵyn jáne orta bıznestiń barlyq kórsetkishteri ótken jyldarmen salystyrǵanda ósimge qol jetkizgen.
QR Prezıdentiniń tapsyrmasyna sáıkes, basty nazar ekonomıkanyń óndiristik jáne óńdeý sektorlaryn damytýǵa baǵyttaldy, bul óńirdegi shıkizat salasynan basqa baǵyttarǵa da úlken qadam jasaýǵa múmkindik berdi.
«Atyraýdyń ózinde byltyr 57 myńnan astam shaǵyn jáne orta bıznes sýbektisi tirkelgen. Bul kórsetkish ótken jyldarmen salystyrǵanda 7,3% joǵary. 2018 jyly atyraýlyq kásipkerler shyǵarǵan ónim kólemi 1.7 trln teńgeni quraǵan. Іshki jalpy ónimdegi shaǵyn jáne orta bıznestiń úlesin arttyrý úshin kásipkerlikti qoldaý baǵdarlamalary júzege asyp jatqany belgili. Solardyń biri - «Bıznestiń jol kartasy - 2020» baǵdarlamasy. Osy ýaqytqa deıin óńirde nesıe somasy 96, 1 mlrd teńge bolatyn 1200-den astam kásipkerdiń jobasy qoldaý tapty», - dedi kásipkerlik ındýstrıaldyq-ınnovatsııalyq damý basqarmasynyń basshysy Aıqyn Eleýsizov.
«Atameken» UKP mamandary Atyraý oblysynda skrınıng ótkizdi, ol bıznesti damytýdyń basym baǵyttaryn anyqtaýǵa jáne nysandardyń ornalasýyn anyqtap, aımaqtyq damý kartalaryn qurýǵa múmkindik berdi.
«Jalpy elimizde búginde 1 mln 240 kásipker tirkelgen. Olarǵa memleket tarapynan árkez qoldaý kóp. Qazirdiń ózinde beriletin ruqsat 70%. Al tekseris 300 myńnan 70 myńǵa qysqardy. Bıznesmenderdiń kásibin damytyp, olardyń arasyndaǵy qarym-qatynasty nyǵaıtý maqsatynda Atyraýda osy salaǵa arnaıy skrınıng júrgizildi. Nátıjesinde 46 myńǵa jýyq kásipkerdiń tizimi qurylǵan. Bazada olardyń alǵan nesıesi, tapshy mamandar, bos jumys oryndary jáne sol aýmaqqa qajet kásipkerlik nysan týraly aqparat jınaqtalǵan», -deıdi jumys tobynyń jetekshisi Anýar Kerimbaev.
«Atyraý oblysynda kásipkerlik salasy qarqyndy damyp keledi. Bizge Elbasy ár oblysta óziniń damý baǵdarlamasy bolý kerek dep tapsyrma bergen bolatyn, soǵan baılanysty ol tapsyrmany Nurlan Asqarulymen kelisip Atyraý oblysynda bir aptada oryndadyq dep baıandap otyrmyz. Sondyqtan Atyraý oblysynyń ádistemesi barlyq oblystarǵa da tájirıbe bolady degen oıymyz bar», - dep atap ótti Abylaı Myrzahmetov
Aımaq basshysy kásipkerliktiń jáne jalpy bıznestiń damýy memlekettiń basty mindeti ekenin de atap ótti.
«Elbasymyz kásipkerlermen kezdesýinde aıtqandaı, sizderdiń osyndaı deńgeıge jetip otyrǵandaryńyz - eldegi turaqtylyqtyń, qoǵamdyq kelisimniń arqasy. Sondyqtan da, isterińiz jalǵasyn tapsyn, kásipkerler. Osy skrınıng nátıjesin kóre otyryp, basqa sala qyzmetkerleri ózderi atqarmaǵan salaǵa bet buratyn shyǵar, jańa kásip kózin ashýǵa múmkindik alady. Úlken jumys atqaryldy. Osy isti ári qaraı jetildireıik. Aýdan ákimderi kúndelikti jumystarynda baıandalǵan máseleniń barlyǵyn paıdalana otyryp, ózderine júkitelgen mindetterdi oryndaýda osy máseleni basshylyqqa alsyn»,- dedi oblys ákimi Nurlan Noǵaev.
Aıta keteıik, skrınıng nátıjeleri Atyraý oblysynyń eatyrau.kz geoportalynda jarııalanǵan.
Ekinshi másele - jergilikti bıýdjetti qalyptastyrý boıynsha oblystyq ekonomıka jáne bıýdjettik josparlaý basqarmasynyń basshysy Aıdar Nuralıev 2018 jyldyń qorytyndysy boıynsha oblystyń áleýmettik ekonomıkalyq damýy jyldan jylǵa ósip kele jatqanyn aıtty.
Jıyndy qorytyndylaı kele oblys ákimi:
«Biz barlyq múmkinshilikti paıdalanýymyz kerek. Oblysymyzdyń bıýdjetin, respýblıkadan bólinetin bıýdjetti tıimdi paıdalanyp, ýaqytyly ıgerýimiz kerek. Qazirgi tańda respýblıkadan qyrýar qarajat bólinip otyr. Prezıdenttiń tapsyrmasyn oryndaý degenimiz bul xalyqtyń ál-aýqatyn jaqsartý. Osy jolda aıanbaı eńbek etýimiz kerek. Berilgen qarajatty tıimdi paıdalanýǵa jumystanýymyz qajet», - dep atap ótti.
