Atyraýda bıyl úsh adam muz astyna túsip mert bolǵan
Atyraý oblystyq tótenshe jaǵdaılar departamenti qoǵammen baılanys tobynyń málimetinshe, sý aıdyndaryndaǵy muz áli de qalyń emes.
«Atyraý oblysynyń aýmaǵyndaǵy sý aıdyndarynda muz áli tolyq qatqan joq. Qazir muzdyń qalyńdyǵy jaǵalaýda - 6-8, orta tusynda - 3-5 sm shamasynda. Biraq, áýesqoı balyqshylar juqa muzdyń ústinen balyq aýlaýǵa shyǵyp, óz ómirine qaýip tóndirýdi jalǵastyrýda. Sol sebepten muz ústimen júrýdiń qaýipti ekenin eskertemiz. Jyl saıyn muz ústindegi qaýipsizdik erejelerin saqtamaýdyń saldarynan ókinishke uryndyrǵan oqys oqıǵalar tirkeledi. Zardap shekkenderdiń arasynda balyq aýlaýǵa shyqqan áýesqoı balyqshylar, muz ústinde oınaıtyn balalar men sý aıdynynyń kelesi jaǵalaýyna ótpek bolǵan turǵyndar bar», -deıdi departamenttiń jedel-qutqarý jasaǵynyń jetekshisi Ádilhan Jumalıev.
Onyń aıtýynsha, tótenshelikterdiń muz ústinde balyq aýlaýshylarǵa aıyppul salýǵa quqyǵy joq. Sondyqtan, qaýipsizdik erejelerin saqtaýǵa ǵana keńes bere alady.
«Qutqarýshylar kún saıyn balyq aýlaýshylar men turǵyndarǵa qaýipsizdik erejesin túsindirip, jadynama taratyp júr. Alaıda, turǵyndar qutqarýshylardyń eskertýine múldem qulaq aspaıdy. Osyndaı selqostyqtyń saldarynan bıyl 3 adam oıylǵan muzdyń astyna túsip, mert boldy. Onyń ishinde kámeletke tolmaǵan bala bar», -dep málim etti Ádilhan Jumalıev.
Eske sala ketelik, budan buryn Atyraýda 8 jasar bala Jaıyq ózenine batqan jasóspirimderdi qutqarýǵa kómekteskenin, keıin Atyraýda 10 jasar bala men zeınetker muz astyna túsip ketkenin jazǵan edik.
