Atyraýda bıyl taǵy 288 páter paıdalanýǵa beriledi
ATYRAÝ. QazAqparat - Atyraýda «Baqytty otbasy» baǵdarlamasyna ótinimder qabyldaý jalǵasady. Atyraý qalalyq ákimdiginiń turǵyn úı-kommýnaldyq sharýashylyǵy, jolaýshy transporty jáne avtojoldar bóliminiń basshysy Rafhat Joldıev osylaı málim etti, dep habarlaıdy QazAqparat Atyraý oblysynyń óńirlik kommýnıkatsııalar qyzmetine silteme jasap.
«Bıyl Atyraý qalasynda tórt turǵyn úı, ıaǵnı, 288 páter paıdalanýǵa beriledi. Qurylystyń bitýine qaraı, turǵyndarǵa páterler kezek retimen berile bastaıdy. Turǵyn úı kezegin azamattar elektrondy úkimet portaly arqyly baqylaıdy», - deıdi Rafhat Joldıev.
Onyń aıtýynsha, byltyr Atyraýda «7-20-25» baǵdarlamasyna qatysýǵa 708 adam ótinim bergen.
«Budan bólek, «Baqytty otbasy» baǵdarlamasyna 200 ótinim kelip túsip, 70 otbasynyń ótinimi maquldandy. Atalǵan baǵdarlama bıyl da jalǵasyp jatyr. «Baqytty otbasy» baǵdarlamasy boıynsha naýryz aıynda ótinimder qabyldaýdy bastaǵan bolatynbyz. Biraq, elimizde tótenshe jaǵdaı rejımi engizilýine baılanysty, ótinim qabyldaý ýaqytsha toqtatyldy. Qazirgi tańda bul baǵyttaǵy jumys qaıta qalpyna keltirilýde «, - deıdi Rafhat Joldıev.
Eske sala ketelik, byltyr Atyraý qalasynda 246 páter tapsyryldy. Onyń ishinde, 173 páter kópbalaly otbasylarǵa berildi. Bıyl tótenshe jaǵdaı engizilgenge deıin Atyraýda 89 otbasy baspanaly boldy.
Aıta ketken jón, qazirgi tańda Atyraýda 21 myń turǵyn páter kezeginde tur. Olardyń qatarynda ata-anasynyń qamqorlyǵynsyz qalǵan balalar, jetimder, áleýmettik turǵydan az qamtylǵan otbasylar, kóp balaly otbasylar, memlekettik qyzmetkerler, bıýdjettik sala qyzmetkerleri jáne turǵylyqty úıleri apatty jaǵdaıda turǵan azamattar bar.
