Atyraýda bıyl masany ýlaýǵa 50,4 mln teńge bólindi
«Kestege sáıkes masany joıý jumystary birinshi kezekte kópqabatty turǵyn úılerdiń jertólesi men kireberisinde júrgiziledi, Budan keıin dezınsektsııa jumystary turǵyn úıler alaby men saıabaqtardy qamtıtyn bolady. Tenderlik konkýrstyń jeńimpazy atanǵan «AG Disinfection» JShS-dan bólingen úsh brıagada quramynda 25 maman men 45 arnaıy tehnıka bar. Qazir arnaıy mamandar rotorly búrikkishpen masany ýlaýdy qolǵa aldy. Bıyl bul maqsatqa jergilikti bıýdjetten 50 mln 400 myń teńge bólindi», - dep habarlady Atyraý qalasy ákimdiginiń baspasóz qyzmetinen.
Belgili bolǵandaı, ótken jylǵa deıin merdiger mekeme munaıly shahar men oǵan taıaý ornalasqan eldi mekenderdi masaǵa qarsy ýlaý jumysymen qamtyǵan. Al qala ákimdigine qaraıtyn aýyldyq okrýgterdiń ákimi masamen kúresti ózderi uıymdastyrady.
Eske salaıy, byltyr Atyraýda masany ýlaýǵa 130 mln teńgege jýyq qarjy bólingenin jazǵan bolatynbyz.
2022 jyly shahar bıýdjetinen masaǵa qarsy dezınsektsııalyq jumysqa 129 mln 995 myń teńge qaralǵan. «Qańtarda masaǵa qarsy dezınsektsııalyq jumysty júrgizýge tenderlik konkýrs jarııalanǵan edi. Alaıda, qatysýshylardyń qujattaryna baılanysty konkýrs sáýir aıyna aýystyryldy. Sol sebepten, qalanyń keıbir bóliginde demeýshilik kómekpen masaǵa qarsy ýlaý bastaldy», - dep habarlaǵan edi qala ákimdiginiń baspasóz qyzmetinen.
