Atyraýda bıyl masany tórt preparatpen ýlap jatyr
Atyraý qalasy ákimdigi baspasóz qyzmetiniń málimetinshe, masany ýlaý júrgizý úshin «AG Dezinfection Services» JShS merdiger retinde tańdalǵan. Seriktestik bas dırektorynyń orynbasary Gúlsara Hodjıbekovanyń aıtýynsha, ýlaý jumystary saǵat 21:00-den soń júrgiziledi.
«Biz jyl saıyn masany ýlaý preparattaryn aýystyryp turamyz. Bıyl fosladın, foslad 50, antıınsekt, mıstın dep atalatyn tórt preparatty qoldanyp otyrmyz. Mundaı preparattardyń adam densaýlyǵyna áseri aldyn ala zerthanada tekseriledi. Sodan soń ǵana qoldanylady», - deıdi Gúlsara Hodjıbekova.
Onyń málimetinshe, masany ýlaý jumysyna arnaıy 25 maman, jel generatory bar 6 GAZel, 5 salqyn tuman shyǵaratyn generator, 3 ystyq tumandatqysh generator, 10 búrký tehnıkasy bólingen.
«Bizdiń mamandar Atyraý qalasyndaǵy shaǵyn aýdandar men saıabaqtarda, turǵyn úı alaby men kóshelerde masaǵa qarsy ý shashý jumysyn júrgizedi. Mundaı jumys shahar mańyndaǵy «Birlik-1», «Birlik-2», «Kókarna», «Vodnıkov», «Shırına», «Aqjaıyq», «Jumysker» eldi mekenderinde atqarylady», - dep málim etti Gúlsara Hodjıbekova.
Eske sala ketelik, buǵan deıin Atyraýda bıyl masany ýlaýǵa 50,4 mln teńge bólingenin jazǵan bolatynbyz. Ákimdiktiń málimetinshe, kestege sáıkes masany joıý jumystary birinshi kezekte kópqabatty turǵyn úılerdiń jertólesi men kireberisterinde júrgiziledi. Budan keıin dezınsektsııa jumystary turǵyn úıler alaby men saıabaqtardy qamtıdy.
«Tenderlik konkýrstyń jeńimpazy atanǵan «AG Disinfection» JShS-dan bólingen úsh brıagada quramynda 25 maman men 45 arnaıy tehnıka bar. Qazir arnaıy mamandar rotorly búrikkishpen masany ýlaýdy qolǵa aldy. Bıyl bul maqsatqa jergilikti bıýdjetten 50 mln 400 myń teńge bólindi», - dep habarlady Atyraý qalasy ákimdiginiń baspasóz qyzmetinen.
