Atyraýda bıyl qysta 40 myńnan asa adam JRVI juqtyrǵan
ATYRAÝ. QazAqparat – Byltyrǵy jeltoqsannan beri jiti respıratorlyq vırýstyq ınfektsııamen 40 myńnan astam atyraýlyq aýyrǵan. Bul aýrý ásirese 14 jasqa deıingi balalar arasynda kóbeıgen, dep habarlaıdy QazAqparat tilshisi.
Atyraý oblystyq sanıtarııalyq-epıdemıologııalyq baqylaý departamenti baspasóz qyzmetiniń málimetinshe, jiti respıratorlyq vırýstyq ınfektsııalar (JRVI) men tumaýdyń epıdemııalyq maýsymy jeltoqsannan mamyrǵa deıin sozylady.
Byltyrǵy 1 jeltoqsannan bergi epıdemııalyq maýsymda jiti respıratorlyq vırýstyq ınfektsııalardyń 41 661 jaǵdaıy tirkelip otyr.
Bul ınfektsııamen 14 jasqa deıingi 26 186 bala, 3 210 júkti áıel aýyrǵany belgili boldy.
«Al, tumaý vırýsynyń alǵashqy jaǵdaıy 2022 jyldyń 30 qyrkúıeginde tirkeldi. Osyǵan baılanysty naýqastardan alynǵan 489 úlginiń 65-nen tumaý aýrýynyń qozdyrǵyshy bar ekeni dádeldendi. Onyń ishinde 37 úlgiden tumaý vırýsynyń V tıpi, 28 úlgiden tumaý vırýsynyń A tıpi anyqtaldy», -dep habarlady departamenttiń baspasóz qyzmeti.
Eske sala ketelik, buǵan deıin Atyraý oblysynda sońǵy tórt jylda alǵash ret qyzylsha juqtyrǵandar tirkelgenin habarlaǵan edik.
Atyraý oblysynda bıylǵy naýryz aıynda qyzyqsha aýrýynyń 4 jaǵdaıy tirkelgen.
«Alǵashqy jaǵdaı bizge shet elden kelgen jasóspirimnen anyqtaldy. Túrkııa elinen kelgen azamattyń balasy vırýsty sol jaqtan juqtyryp kelgen. Qazir qyzylsha juqtyrǵan 4 jaǵdaıdyń bireýi zerthanalyq taldaýmen dáleldendi. Qalǵan 3 jaǵdaıdyń zerthanalyq nátıjesin kútip otyrmyz», -dep habarlady departamenttiń bólim basshysy Aınagúl Sársenǵalıeva.
