Atyraýda bıyl kópqabatty 34 úı paıdalanýǵa beriledi
ATYRAÝ. QazAqparat - Atyraýda turǵyn úı baǵasynyń arzandaıtyny boljanýda, dep habarlaıdy QazAqparat tilshisi.
Qala ákiminiń baspasóz qyzmetinen málim etkendeı, salynyp jatqan baspanalar kóleminiń ulǵaıýy jyljymaıtyn múlik naryǵynda baǵanyń tómendeýine oń áserin tıgizbek.
2018 jyly óńirde 3892 páterlik 44 kópqabatty turǵyn úıdiń qurylysy bastaldy. Onyń 39-y oblys ortalyǵynda boı kóterip jatsa, qalǵany - aýdandarda. 34 turǵyn úı paıdalanýǵa bıyl berilmek.
Ákimdiktiń baspasóz qyzmetinen atap ótkendeı, shahar basshysy Alımuhammed Quttumuratuly «Bereke» yqshamaýdanyndaǵy turǵyn úılerdiń qurylysyn tekserip shyǵyp, birqatar naqty tapsyrmalar júktedi.
«Mundaı kóp turǵyn úıdiń qurylysy jeke qurylys salýshylar tarapynan qyzyǵýshylyqtyń joǵary bolýynyń nátıjesinde múmkin boldy. Oblys basshylyǵymen óńirdiń ınvestıtsııalyq ahýalyn jaqsartý boıynsha birqatar jumystar atqaryldy. Bul óz kezeginde Atyraýda qurylys salasynda serpilisin týdyrdy. Bizdiń mindetimiz - óz qarajatyn turǵyn úı qurylysyna ınvestıtsııalaǵysy keletinder úshin meıilinshe qolaıly jaǵdaılar jasaý. Bul óz kezeginde ıpotekalyq turǵyn úı naryǵynda baǵanyń tómendeýine oń áserin tıgizetin bolady», - dedi Alımuhammed Quttumuratuly.
