Atyraýda biryńǵaı baılanys ortalyǵyna 400 myńnan asa turǵyn habarlasqan
Óńirlik kommýnıkatsııalar qyzmetiniń málimetinshe, «Jedel jeli» túrindegi biryńǵaı baılanys ortalyǵyna búginge deıin 401 604 turǵyn habarlasyp, ártúrli másele boıynsha keńes alǵan.
Munda 16 operator men 8 dıspetcher tórt aýysymmen táýlik boıy qyzmet kórsetedi.
«Atyraý oblysynyń ákimdigi «Halyq únine qulaq asatyn memleket» tujyrymdamasyn kommýnıkatsııanyń jańa quraldaryn qoldaný arqyly belsendi túrde júzege asyrýda. Qazir biryńǵaı baılanys ortalyǵynyń mamandary turǵyndar ótinishin «109» qysqa nómiri, WhatsApp chat-bot, oblys ákimdiginiń saıty (ótinishter qabyldaý vıdjeti), 109@scatyrau.kz elektrondy poshtasy jáne (atyrau109) Telegram chat-bot, sondaı-aq, baılanys ortalyǵynyń arnaıy mobıldi qosymshasy arqyly qabyldap otyr» dep habarlady óńirlik kommýnıkatsııalar qyzmeti.
Al barlyq deńgeıdegi ákimderdiń qabyldaýyna jyl basynan beri 1479 azamat kelgen. Oblys ákimi turǵyndarmen 10 ret kezdesý ótkizip, 123 azamatty jeke qabyldaǵan. Sondaı-aq, oblys ákimdiginiń qoǵamdyq qabyldaýyna 1800-den asa azamat jeke máselesimen habarlasyp, keńes alǵan.
Eske sala ketelik, budan buryn Atyraý oblysynyń ákimi Mahambet Dosmuhambetov turǵyndardy onlaın qabyldaǵanyn habarlap edik.
