Atyraýda birneshe ret para alǵan sheneýnik 31 mln teńge aıyppul tóleıdi

ATYRAÝ. QazAqparat - Atyraý qalasynyń №2 sotynda memlekettik sáýlet-qurylys baqylaý basqarmasynyń basshysy Rashıd Alıpbaev jáne atalǵan basqarmanyń bólim meńgerýshisi Asylbek Omarqulovqa qatysty qylmystyq is qaraldy, dep xabarlaıdy QazAqparat tilshisi.

"Sotqa deıingi tergeý organdary R.Alıpbaevqa Qazaqstan Respýblıkasy Qylmystyq kodeksi 366-babynyń 3-bóligi 1),4) tarmaqtary (birneshe ret qorqytý arqyly para alý) boıynsha aıyp taqqan. A. Omarqulov Qazaqstan Respýblıkasy QK 190-babynyń 3-bóligi (Alaıaqtyq), 366-baby (Іri mólsherde para alý), 368-baby (qyzmettik jaǵdaıyn paıdalaný arqyly paraqorlyqqa deldal bolý) boıynsha sotqa berilgen.

R.Alıpbaev jáne A.Omarqulov sotqa deıingi tergeý barysynda kináni moıyndaý týraly mámile túrindegi protsessýaldyq kelisimshart jasaǵandyqtan, olarǵa qatysty qylmystyq is sotqa prokýrordyń kelisimdik óndirispen qaraý týraly ótinishimen túsken.

Tergeý organdary anyqtaǵandaı, A.Omarqulov 2018 jyldyń sáýir aıynda qala turǵynynan salmaq túsetin jáne qorshalatyn konstrýktsııalar bóliginde birinshi deńgeıdegi jaýapkershilik kózdelgen obektilerge tehnıkalyq baqylaý sarapshysynyń attestatyn berý úshin 200 000 teńge alǵan. Keıin ol aqshany R.Alıpbaevqa para retinde bergen.

Sondaı-aq, sáýir aıynda R.Alıpbaev MSQBB atynan usynymdyq hat berý úshin qala turǵynynan 250 000 teńge para alǵan.

Budan basqa, 2018 jyldyń mamyr aıynda belgili JShS óndiris boıynsha dırektory «e-gov» portaly arqyly lıtsenzııaǵa qosymsha jumystardy engizý týraly tapsyrys berip, alaıda onyń tapsyrysynan bas tartylǵan. Keıin ol A.Omarqulovqa kómek surap kelgen, al ol máseleni sheshý úshin 200 000 teńge talap etken.

Aǵymdaǵy jyldyń qańtar aıynda basqa JShS 1 jáne 2 sanattaǵy jobalyq qyzmetke lıtsenzııa alý maqsatynda MSQBB-ǵa halyqqa qyzmet kórsetý ortalyǵy arqyly qujattaryn tapsyrǵan, alaıda oǵan da lıtsenzııa berilmegen. Atalǵan JShS ókili MSQBB basshysynyń mindetin atqarýshy A.Omarqulovqa júginip, ol jaǵdaıdy ońtaıly sheshý úshin 24 000 AQSh dollaryn talap etken" dep xabarlady Atyraý qalasy №2 sotynyń baspasóz qyzmetinen.

Nátıjesinde ol aqsha alý sátinde quryqtalǵan.

Sot Alıpbaev pen Omarqulovty qylmystyq áreketteri úshin kináli dep tanydy.

"Sot úkimimen R.Alıpbaevqa paranyń jetpis eselengen mólsherinde, ıaǵnı 31 500 000 teńge aıyppul salyndy. A.Omarqulovqa 3 jyl merzimge bas bostandyǵynan aıyrý jazasyn qaýipsizdigi ortasha mekemede óteý belgilendi.Sondaı-aq, olar ómir boıyna memlekettik qyzmet atqarý quqyǵynan aıyryldy" dep xabarlady baspasóz qyzmetinen.