Atyraýda birneshe ret para alǵan departament basshysy sottaldy
Eńbek, áleýmettik qorǵaý jáne kóshi-qon komıteti Atyraý oblysy boıynsha departamentiniń basshysy birneshe para alǵan. Oǵan qatysty qylmystyq is Atyraýdaǵy №2 qalalyq sotynda qaraldy.
Birneshe ret para alý kúdigine ilingen departament basshysy G. memlekettik fýnktsııalardy oryndaýǵa ýákilettik berilgen adam bola tura, qyzmet babyn paıdalanyp, alaıaqtyq jasaý deregimen tergelgen. Departament basshysyna birneshe ret para bergen K.-ǵa, paraqorlyqqa deldal bolǵan Z.-ǵa qatysty qylmystyq is qozǵalǵan.
«Memlekettik fýnktsııalardy oryndaýǵa ýákilettik berilgen adam bola tura G. qyzmettik ókilettikterine kiretin jáne laýazymyny baılanysty óziniń senimdi tulǵasy deldal Z. arqyly K.-nyń paıdasyna áreket jasap, birneshe ret para alǵan. Sonymen qatar, kúdikti R. men B.-nyń senimine kirip, 30 000 teńge kóleminde aqsha qarajatyn alaıaqtyqpen ıemdengen», -dep habarlady №2 qalalyq sottyń baspasóz qyzmeti.
Sottalýshylar qylmystyq iske baılanysty jınaqtalǵan dáleldemelerdi, is-árekettiń saralanýyn daýlamaıtynyn, kináni moıyndaý týraly protsestik kelisimdi jasaýdy suraǵan. Sot tergeýi kezinde prokýrordyń, sottalýshylar men olardyń advokattarynyń qatysýymen kináni moıyndaý týraly protsestik kelisim jasaqtalǵan.
«Sot úkimimen sottalýshy G. QR Qylmystyq kodeksiniń 366-babynyń 3-bóligi 4-tarmaǵymen kináli dep tanylyp, memlekettik qyzmette jáne memlekettik uıymdarda laýazymdardy atqarý quqyǵynan ómir boıyna aıyra otyryp, oǵan 4 900 000 teńge aıyppul salý jazasy taǵaıyndaldy. Cottalýshy Z. atalǵan qujattyń 368-babynyń 2-bóligimen kináli dep tanylyp, memlekettik qyzmette jáne memlekettik uıymdarda laýazymdardy atqarý quqyǵynan ómir boıyna aıyrylyp, 1 350 000 teńge aıyppul salý jazasyna sottaldy. Al, sottalýshy 367-baptyń 3-bóligi 3-tarmaǵymen kináli dep tanylǵan K. memlekettik qyzmette jáne memlekettik uıymdarda laýazymdardy atqarý quqyǵynan ómir boıyna aıyra otyryp, oǵan 5 750 000 teńge aıyppul salý jazasy taǵaıyndaldy», -dep málim etti sottyń baspasóz qyzmetinen.
Sot úkimi zańdy kúshine engen joq.
Eske sala ketelik, budan buryn Baqytgúl Hamenovanyń sotynda basqarma basshysy oǵan jala japqanyn aıtqanyn jazǵan edik.