Atyraýda birinshi toptaǵy múgedek júrgizýshi kýáligin aldy

ATYRAÝ. QazAqparat – Atyraýda birinshi toptaǵy múgedek Keńges Konıev qolmen basqarýǵa arnalǵan kólikpen júrgizýshi kýáligin alý úshin emtıhan tapsyrdy.

Buryn qurylysshy bolyp jumys istegen Keńges 2006 jyly jaraqat alǵan. Sol jaraqatynan soń birinshi top múgedegi retinde qolarbaǵa tańyldy. Alaıda, ol ómirge qushtarlyǵyn joǵaltqan joq. Sportpen aınalysyp, ústel tennısinen Qazaqstannyń chempıony, Halyqaralyq dárejedegi sport sheberi atandy.

Endi ol qyzyn balabaqsha men mektepke aparý, otbasynyń ózge de qajettiligi úshin kólik júrgizgisi keledi. Sol sebepten, múgedektigi bar jandarǵa arnalǵan kólikke miný úshin synaq tapsyrdy. Alaıda, ol buǵan deıin eki ret teorııalyq emtıhannan óte almady.

Jaqynda Keńges kólik júrgizý mashyǵyna tııanaqty daıyndalyp, úshinshi múmkindigin múlt jibermedi. Tájirıbelik emtıhandy da sátti tapsyrdy. Sóıtip, ol kólik júrgizý kýáligin aldy. «Azamattarǵa arnalǵan úkimet» memlekettik korporatsııasy KE AQ Atyraý oblysy boıynsha fılıaly mamandarynyń aıtýynsha, Keńges Konıev ­– erekshe sanattaǵy jandardyń arasynan kólik júrgizý quqyǵyna ıe bolǵan alǵashqy atyraýlyq.

Joldasbek Kósherbaıuly