Atyraýda birden 4 kólik soǵylyp, jaıaý júrginshi jolyndaǵy adam kóz jumdy
Oblystyq polıtsııa departamentiniń baspasóz qyzmetinen málim etkendeı, jol-kólik oqıǵasy búgin, 18 qarashada bolǵan.
«Búgin jergilikti ýaqytpen saǵat 09:00 shamasynda Toyota Camry avtokóliginiń 31 jastaǵy júrgizýshisi birneshe jol-kólik oqıǵasyna sebepker boldy. Júrgizýshi Atyraý qalasyndaǵy M.Baımuhanov kóshesiniń boıynda qarama-qarsy baǵytqa shyǵyp, áýeli jol jıeginde ornalasqan elektr baǵanasyna soqtyǵysqan. Kólik soqqy ekpinimen sol mańdaǵy qurylys nysanynyń qorshaýyna soǵylyp, jaıaý júrginshilerge arnalǵan jolaqta kele jatqan er adamdy qaǵyp qulatqan. Budan keıin turaqta turǵan Hyundai Elantra men VAZ – 2111 avtkólikterine soǵylǵan. Al, Hyundai Elantra avtokóligi soqqy ekpinimen jolda kele jatqan Volkswagen Passat avtokóligimen túıisti. Jol-kólik oqıǵasynyń saldarynan Toyota Camry kóligi qaqqan jaıaý júrginshi oqıǵa ornynda kóz jumdy», -dep habarlady departamenttiń baspasóz qyzmeti.
Qazir jol-kólik oqıǵasynan mert bolǵan er adamnyń jeke basyna qatysty aqparat anyqtalyp jatyr. Jol-kólik oqıǵasyn jasaǵan kólik júrgizýshisine qatysty tıisti is-qujattary jınaqtalyp, tergeý amaldaryn júrgizý bastaldy.
«Polıtsııa qyzmetkerleri kólik júrgizýshilerinen jolda júrý qaýipsizdigin qatań saqtaǵan jón. Kólik júrgizýshileri jolaýshylar men óziniń ómirine, densaýlyǵyna jaýapkershilikpen qarap, jol qozǵalysy kezinde qaýipsizdik sharalaryn basty nazarǵa alý qajettigin eskertemiz», -dep málim etti departamenttiń baspasóz qyzmetinen.
Eske sala ketelik, budan buryn Atyraýda avtobýs qaqqan jaıaý júrginshi mert bolǵanyn jazǵan edik.