Atyraýda bir jarym jyl boıy jasyrynyp kelgen qylmysker sottaldy
ATYRAÝ. QazAqparat - Atyraýda adam óltirip, bir jarym jyl boıy jasyrynyp kelgen er adam 8 jylǵa bas bostandyǵynan aıyryldy, dep habarlaıdy QazAqparat tilshisi.
«Sot barysynda anyqtalǵandaı, bir jarym jyl buryn sottalýshy janjal kezinde tanysyn urǵan. Er adam esin jımastan, Atyraý oblystyq aýrýhanasynyń jansaqtaý bóliminde kóz jumady. Sol túni sottalýshy zardap shegýshiniń qaıtys bolǵanyn estip, tergeýden jasyrynǵan jáne oǵan izdeý salynǵan. Kúdiktini Qazaqstannyń basqa óńirindegi polıtseıler ustaǵan», - dedi Atyraý qalalyq №2 sotynyń baspasóz qyzmeti.
Sotqa deıingi tergeý kezinde sottalýshy taǵylǵan aıypty moıyndaǵan joq. Ol shabýyl jasaýshydan qorǵanǵanyn alǵa tartty. Alaıda, onyń kinási kýágerler men zardap shegýshi ókiliniń kýáliginen bólek, is materıaldaryndaǵy zertteýmen tolyqtaı dáleldendi.
«Aıyptalýshy sottyń úkimimen kináli dep tanylyp, 8 jylǵa bas bostandyǵynan aıyryldy. Ol jazasyn qaýipsizdigi ortasha qylmystyq-atqarý júıesi mekemesinde óteıtin bolady. Budan bólek, sottalýshydan 3 mıllıon teńge kóleminde moraldyq zalal, 200 myń teńge kóleminde ókildik shyǵyndar jáne memleketke 566 904 teńge óndirildi», - dep aqparat berdi Atyraý qalalyq №2 sotynyń baspasóz qyzmeti.
