Atyraýda bir túnde ustalǵan 9 mas júrgizýshi qamaýǵa alyndy
ATYRAÝ. QazAqparat – Atyraýda bir túnde ustalǵan 9 mas júrgizýshi qamaýǵa alyndy, dep habarlaıdy QazAqparat.
Oblystyq Polıtsııa departamenti baspasóz qyzmetiniń málimetine qaraǵanda, bir túnde kólikti mas kúıde basqarǵan 9 mas júrgizýshi ustalǵan.
«Máselen, 25 qyrkúıekte saǵat 04:10 shamasynda Atyraý qalasyndaǵy Vladımırskıı kóshesinde «Cadillac Escalade» markaly avtokólik toqtatyldy. Tekserý kezinde rýlde otyrǵan 1983 jylǵy júrgizýshiden ishimdiktiń ıisi baıqalǵan. Medıtsınalyq saraptamanyń korytyndysymen onyń jeńil dárejede mas ekeni anyqtaldy. Oǵan qatysty QR Ákimshilik quqyqbuzýshylyq týraly kodeksiniń 608-babynyń 1-bóligimen (Júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúıde basqarýy, sol sııaqty kólik quralyn alkogoldik, esirtkilik jáne (nemese) ýytqumarlyq masań kúıdegi adamnyń basqarǵany úshin) ákimshilik hattama toltyryldy», - dep habarlady departamenttiń baspasóz qyzmeti.
Bir túnde ustalǵan 9 júrgizýshiniń kóligi arnaýly turaqqa qoıylǵan. Barlyǵy da 7 jylǵa júrgizýshi kýáliginen aıyrylyp, sot sheshimimen 15 táýlikke ákimshilik qamaýǵa alyndy.
Eske salaıyq, buǵan deıin Atyraýda jyl basynan beri 400-den astam mas júrgizýshi ustalǵanyn jazǵan edik.
