Atyraýda bir mezette turaqta turǵan eki júk kóligi órtenip ketti
ATYRAÝ. QazAqparat – Atyraýda bir mezette turaqta turǵan eki júk kóligi órtenip ketti, dep habarlaıdy QazAqparat.
Búgin, 25 aqpanda saǵat 08:01-de Atyraý qalasynda turaqta turǵan eki sheteldik júk kóliginen órt shyqqan.
«Atambaev kóshesiniń boıynda kásiporyn aýmaǵynda «Mersedes» jáne «Renault Magnum» markaly júk kólikteriniń kabınasy órtendi. Eki kólikte de júk bolmaǵan. Órt saǵat 08:33-te oqshaýlanyp, saǵat 08:35-te sóndirildi. Jalyndy sóndirýge 11 órt sóndirýshi men 2 arnaıy tehnıka jumyldyryldy», -dep habarlady oblystyq tótenshe jaǵdaılar departamentiniń baspasóz qyzmeti.
Eske sala ketelik, budan buryn Atyraý oblysynda kólikten shyqqan órt turǵyn úıdi sharpyǵanyn habarlaǵan bolatynbyz.
