Atyraýda bir kúnde joǵalǵan 6 bala tabyldy

ATYRAÝ. QazAqparat – Atyraýda bir kúnde iz-túzsiz joǵalǵan 6 bala tabyldy, dep habarlaıdy QazAqparat.

Oblystyq polıtsııa departamenti baspasóz qyzmetiniń málimetinshe, tártip saqshylary barlyq balany sol kúni taýyp, úıine qaıtarǵan.

«Atyraý qalalyq polıtsııa basqarmasynyń kezekshi operatoryna 1 mamyrda jasóspirimderdiń, sonyń ishinde balalardyń turǵylyqty mekenjaıynan belgisiz baǵytqa shyǵyp ketip, habar-osharsyz joǵalý deregimen 6 habar tústi. Máselen, 38 jastaǵy áıel saǵat 17:00 shamasynda polıtsııanyń 102 arnasyna 4 jasar ulynyń joǵalǵany týraly habar bergen. Polıtsııa qyzmetkerleri joǵalǵan balany jedel izdestirý is-sharasyn júrgizdi. Balaqaı 2 saǵatta tabyldy. Keıin 4 jasar balanyń oınap júrip, ájesiniń úıine ketip qalǵany anyqtaldy. Biraq, bul týraly anasy bilmegen.

Tártip saqshylary Atyraý qalasynda iz-túzsiz ketken 6 jasóspirimniń bárin sol kúni 1-2 saǵattyń ishinde taýyp, otbasyna qaıtardy. Belgili bolǵandaı, joǵalǵan balalar ata-ana qaraýynsyz qalǵan», - dep málim etti departamenttiń baspasóz qyzmetinen.

Osyǵan baılanysty polıtsııa qyzmetkerleri ata-analarǵa qyraǵy bolyp, balalaryn qaraýsyz qaldyrmaý qajettigin eskertip otyr.

Eske sala ketelik, buǵan deıin Atyraýda ájesinen adasyp qalǵan 5 jasar bala joǵalyp ketkenin habarlaǵan bolatynbyz.