Atyraýda bir aı ókpeni jasandy jeldetý apparatyna qosylǵan áıel emdelip shyqty
ATYRAÝ. QazAqparat – Atyraýda ókpesi 96 paıyz qabynyp, bir aı boıy ókpeni jasandy jeldetý apparatyna qosylǵan áıel emdelip shyqty, dep habarlaıdy QazAqparat.
Oblystyq densaýlyq saqtaý basqarmasy baspasóz qyzmetinen málim etkendeı, 59 jastaǵy Altyn Tólegenova maýsym aıynyń basynda Inder aýdandyq aýrýhanasyna túsken.
Jaǵdaıy nasharlaǵan soń Atyraý qalasyndaǵy modýldik aýrýhananyń jansaqtaý bólimine aýystyrylǵan.
«Jansaqtaý bóliminde kelgende eki jaqty pnevmonııa, ókpeniń 96% qabynýy degen dıagnoz qoıyldy. Bir aı boıy ókpeni jasandy jeldetý apparatyna qosýly jattym.
Dárigerlerdiń kúsh-jigeriniń nátıjesinde qaýipti vırýstan aman qaldym. Meni beıindi bólimsheniń palatasyna aýystyrdy, onda emdeýdi jalǵastyrdym», - deıdi Altyn Tólegenova.
Búgin, 10 tamyzda Altyn Tólegenova modýldik aýrýhananyń ınfektsııalyq statsıonarynan shyǵaryldy. Qazir onyń ókpesi 12% zaqymdanǵan. Endi úsh aı boıy turǵylyqty mekenjaıy boıynsha dárigerlerdiń baqylaýynda bolady. Sondaı-aq, arnaıy ońaltýdan ótedi.
«Men 10 kún boıy ottegi kontsentratorynyń kómegimen dem alamyn. Sodan keıin dárigerlerdiń baqylaýymen ókpeniń jumysyn qalpyna keltiremin. Osy oraıda emdelý kezinde dárigerlerge kórsetken qamqorlyǵy men jyly sózderi úshin alǵysymdy bildirgim keledi. Al, turǵyndardan týǵan-týystaryńyz ben jaqyndaryńyzdyń qaýipsizdigi úshin
betperde kıip, adamdar kóp jınalatyn oryndarǵa barmaýdy suraımyn», - deıdi Altyn Tólegenova.
Eske sala ketelik, buǵan deıin Atyraýda ókpesi 90 paıyz qabynǵan áıel emdelip shyqqanyn jazǵan bolatynbyz.
