Atyraýda bir aptada júrgizýshi kýáliginsiz rýlge otyrǵan 11 adam ustaldy
Oblystyq polıtsııa departamenti baspasóz qyzmetiniń aqparatyna súıensek, patrýldik polıtsııa qyzmetkerleri sońǵy aptada júrgizýshi kýáliginen aıyrylsa da kólik júrgizgen 3, kólik quralyn basqarý quqyǵy bolmasa rýlge otyrǵan 11 adam ákimshilik jaýapqa tartylǵan.
«Máselen, 31 tamyzda saǵat 10:12 shamasynda oblys ortalyǵyndaǵy Azattyq dańǵyly men Ó.Atambaev kóshesiniń qıylysynda Reseı Federatsııasynda tirkelgen «Vaz-211440» markaly avtokóligi toqtatylǵan. Tekserý kezinde 29 jastaǵy azamattyń buryn QR Ákimshilik quqyqbuzýshylyq týraly Kodeksiniń 608-babymen kólik quralyn basqarý quqyǵynan aıyrylǵany anyqtaldy. Quqyq buzýshyǵa atalǵan kodekstiń 612-babynyń 3-bólimimen (Kólik quralyn basqarý quqyǵynan aıyrylǵan tulǵanyń kólik quralyn basqarýy) ákimshilik hattama toltyryldy. Atyraý qalalyq ákimshilik sotynyń sheshimimen kináli dep tanylǵan azamatqa 145 850 teńge kóleminde aıyppul salyndy» - dep málim etti departamenttiń baspasóz qyzmetinen.
Sondaı-aq, 6 qyrkúıekte Azattyq dańǵylynda toqtatylǵan «VAZ-2114» markaly kólik júrizgen azamatta júrgizýshi kýáligi bolmaǵan. Onyń basqarýyndaǵy kólik quraly arnaýly turaqqa qoıylǵan. Al, kólik júrgizýge quqyǵy joq 20 jastaǵy jigitke qatysty QR Ákimshilik quqyqbuzýshylyq týraly Kodeksiniń 612-babynyń 2-bólimimen ákimshilik hattama jasaqtalyp, 29 170 teńge kóleminde aıyppul salyndy.
Eske sala ketelik, budan buryn kóligine ksenon taqqan 800-den astam atyraýlyq júrgizýshi jazalanǵan bolatyn.