Atyraýda bir aptada habar-osharsyz ketken 12 bala úıine qaıtaryldy
ATYRAÝ. QazAqparat – Atyraýda polıtseıler bir aptada habar-osharsyz ketken 12 jasóspirimdi úıine qaıtardy, dep habarlaıdy QazAqparat.
Oblystyq polıtsııa departamentiniń baspasóz qyzmetinen málim etkendeı, 2-8 tamyz aralyǵynda 102 operatoryna jasóspirimderdiń habar-osharsyz ketýine baılanysty 12 habar túsken.
«Polıtsııa qyzmetkerleri 12 jasóspirimdi 2-3 saǵatta izdep taýyp, ata-anasyna tabystady. Máselen, 3 tamyz saǵat 23:00 shamasynda «Nursaıa» shaǵyn aýdanynyń turǵyny kópqabatty úıdiń biriniń mańynan adasyp júrgen 4 jastaǵy balany taýyp alǵanyn habarlady. Polıtseıler adasqan balanyń ata-anasyn dereý izdep tapty» -dep málim etti departamenttiń baspasóz qyzmetinen.
Tórt jasar balanyń ata-anasyna túngi saǵat 23:00-den keıin zańdy ókilderiniń erip júrýinsiz turǵyn-jaıdan tys jerde júrýine jol bergeni úshin QR Ákimshilik quqyqbuzýshylyq týraly Kodeksiniń 442-babynyń 2-bólimimen ákimshilik hattama toltyrylyp, eskertý berildi.
Eske sala ketelik, buǵan deıin Atyraýda joǵalǵan balalar tabylǵanyn habarlaǵan bolatynbyz.
