Atyraýda bir aptada ǵana 20 adam kólik júrgizý quqyǵynan aıyryldy

ATYRAÝ. QazAqparat – Atyraýda 1-7 maýsymda 20 júrgizýshi kólik júrgizý quqyǵynan aıyryldy, dep habarlaıdy QazAqparat.

Oblystyq polıtsııa departamenti baspasóz qyzmetiniń málimetinshe, júrgizýshiniń bári mas kúıde kólik rýline otyrǵan.

«Patrýldik polıtsııa qyzmetiniń ınspektorlary sondaı júrgizýshiniń birin 3 maýsym kúni saǵat 11:20 shamasynda ustady. Júrgizýshi Atyraý qalasyndaǵy Z.Qabdolov kóshesinde «VAZ – 2114» avtokóligin júrgizip kele jatqan. Tekserý kezinde 38 jastaǵy júrgizýshiniń alkogoldik ishimdik ishkeni anyqtalyp, medıtsınalyq saraptamaǵa jetkizildi. Saraptama qorytyndysymen júrgizýshiniń orta dárejeli masań kúıde bolǵany dáleldendi. Bir aptada osyndaı áreketpen 20 júrgizýshi anyqtaldy», -dep habarlady departamenttiń baspasóz qyzmetinen.

Mas kúıde kólik basqarǵan júrgizýshige qatysty QR Ákimshilik quqyqbuzýshylyq týraly kodeksiniń 608-baby 1-bóligimen (Júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúıde basqarýy, sol sııaqty kólik quralyn alkogoldik, esirtkilik jáne (nemese) ýytqumarlyq masań kúıdegi adamnyń basqarǵany úshin) ákimishilik hattama toltyryldy. Sot sheshimimen júrgizýshi 7 jylǵa kólik quralyn basqarý quqyǵynan aıyrylyp, 15 táýlikke ákimshilik qamaýǵa alyndy.

Bir aptada ishimdik iship, kólik basqarǵan 20 júrgizýshige osyndaı jaza taǵaıyndaldy.

Eske sala ketelik, buǵan deıin Atyraý turǵyny 100-den astam aıyppuly bar kólikti satyp alǵanyn jazǵan bolatynbyz.