Atyraýda bıoakýstıkalyq mı túzetý klınıkasy ashyldy
ATYRAÝ. QazAqparat – Atyraýda halyqaralyq balalardy qorǵaý kúnine oraı «CEREBRUM» bıoakýstıkalyq mı túzetý klınıkasy ashyldy, dep habarlaıdy QazAqparat.
Klınıkanyń jetekshisi, tájirıbeli nevrolog dáriger, erekshe balanyń anasy Laýra Isaeva byltyr «Áleýmettik baǵdarlamalar men ınnovatsııa» qory júzege asyratyn «Jarqyra» baǵdarlamasynan paıyzsyz nesıe alǵan. Sol qarjyǵa qural-jabdyq satyp alyp, bıoakýstıkalyq mı túzetý kabınetin ashqan.
Laýra Isaevanyń aıtýynsha, munda aýtızm, psıhıkalyq jáne sóıleý qabileti tejelgen, sal dertine, Daýn sındromyna shaldyqqan, neırosensorlyq kereńdigi bar, epısındrom, sondaı-aq, basqa da nevrologııalyq aýrýlary bar balalarǵa em júrgizý kózdelip otyr. Em eki baǵytta júrgiziledi. Birinshisi – ortalyq júıke júıesiniń qyzmetin dári-dármeksiz qalpyna keltiretin bıoakýstıkalyq mı túzetý. Ekinshisi– ortalyq júıke júıesi men perıferııalyq júıke júıesin apparat arqyly emdeıtin transkranıaldy jáne transverterebraldy mıkropolıarızatsııa.
«Júıke aýrýlaryn emdeýdegi bul tásilder tıimdiligin dáleldedi. Búginge deıin klınıkada 300-den asa balaǵa medıtsınalyq kómek kórsetildi. Basym kópshiliginde jaqsy nátıje baıqaldy. Arasynda sóılep ketken balalar bar. Bizdiń aımaqta nevrologııalyq aýrýlardy zamanýı ádispen emdeıtin klınıka az. Sol sebepten, «Jarqyra» jobasyna qatystym. Meniń jobama berilgen qarjymen «CEREBRUM» bıoakýstıkalyq mı túzetý klınıkasyn ashýǵa múmkindik týdy» deıdi Laýra Isaeva.
Eske sala ketelik, budan buryn Atyraý oblysynyń ákimi balalar úıindegi sábılerdiń tusaýyn keskenin habarlaǵan edik.
