Atyraýda bıikten qulaǵan eki elektrmontajdaýshynyń biri qaıtys boldy
ATYRAÝ. QazAqparat – Atyraýda bıikten qulaǵan eki elektrmontajdaýshynyń biri qaıtys boldy, dep habarlaıdy QazAqparat.
Oqys oqıǵa keshe, 10 tamyzda saǵat 15:00 shamasynda bolǵan.
«Atyraý Jaryq» AQ-nyń elektromonterler brıgadasy avtogıdrokótergishtiń kómegimen 6-7 metr bıikte joǵary voltty elektr jelisiniń symdaryn montajdaǵan. Sol kezde manıpýlıatordyń avtomunarasy qulap, montajdaýshy eki adam aýyr dene jaraqatyn alǵan. Onyń ekeýi de oblystyq aýrýhanaǵa jetkizilgen. Alaıda, zardap shekken jumysshynyń biri aýrýhanada kóz jumǵan.
«Qazir «Atyraý Jaryq» AQ-nyń qyzmetkeri – 1979 jyly týǵan azamattyń ólimine qatysty QR Qylmystyq Kodekstiń 156-babynyń 3 bóligimen sotqa deıingi tergeý júrgizilip jatyr. Múrdege sot-medıtsınalyq saraptama taǵaıyndaldy» -dep habarlady oblystyq polıtsııa departamentiniń baspasóz qyzmeti.
Eske sala ketelik, budan buryn Atyraýda er adam elektr jelisine soǵylyp, kóz jumǵan.
