Atyraýda beıbit kúnniń batyry Shalqar Aqymǵalıevtyń qurmetine kókpar uıymdastyryldy
ATYRAÝ. QazAqparat - Atyraýda Shalqar Aqymǵalıevtyń rýhyna baǵyshtalyp uıymdastyrylǵan jappaı kókparǵa 30-dan asa shabandoz qatysty, dep habarlaıdy QazAqparat.
Jappaı kókpardy "NurAtyraý Qurylys" JShS-i uıymdastyrdy. Mekeme qoldaýymen kıiz úı tigilip, qazaqsha kúreske kilem jaıylyp, Quran oqyldy. Sharaǵa Shalqar Aqymǵalıevtiń anasy Lázzat Májenqyzy, qaıǵyly oqıǵany bastan keshirgen Rústembek Súndetov, el azamattary, qala turǵyndary men qonaqtary qatysty.
Shara barysynda Shalqar batyrymyzdyń anasyna alǵys xat tabystalyp, Rústembek batyrymyzǵa shapan jabyldy.
«Atyraý oblysynda ulttyq sport, sonyń ishinde kókpar qarqyndy damyp keledi. Qazirgi tańda qalamyzda apta saıyn jeke azamattar, mekemeler uıymdastyrýymen jappaı kókpar, toptyq kókpar uıymdastyrylady. Búgingi shara halyq batyry Shalqardyń rýhyna uıymdastyryldy. Bul eline eleýli azamat, onyń erlik qadamy máńgilik el jadynda»,- dedi Atyraý oblystyq Ulttyq sport túrleri Federatsııasynyń prezıdenti Aslanbek Janbalaev.
Eske sala keteıik, 21 naýryz kúni Atyraýda Shalqar Aqymǵalıev Jaıyq ózenine kópirden sekirgen boıjetkendi qutqaryp, ózi qaza bolǵan edi.
