Atyraýda bekire tuqymdas balyqtardy satýmen aınalysqandarǵa úkim shyqty
ATYRAÝ. QazAqparat - Atyraýda zańsyz bekire tuqymdas balyqtaryn satýmen aınalysqan tulǵalarǵa qatysty úkim shyqty, dep habarlaıdy QazAqparat tilshisi.
Atyraý qalasynyń №2 sotynyń úkimimen I.K., A.K., N.T. Qazaqstan Respýblıkasynyń QK-niń 339-babymen kózdelgen (janýarlardyń sırek kezedesin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen zańsyz aınalysý) qylmystyq quqyq buzýshylyqty jasaǵandary úshin kináli dep tanylyp, árqaısysyna 1 jyl 6 aı merzimge bas bostandyǵyn shekteý jazasy taǵaıyndaldy.
Osy úkimmen I.K. QK-niń 262-babynyń 1-bóligimen (uıymdasqan qylmystyq topty qurý, oǵan basshylyq etý), A.K., N.T. QK-niń 262-babynyń 2-bóligimen (uıymdasqan qylmystyq topqa qatysý), E.S. jáne K.J. QK-niń 262-babynyń 2-bóligimen, 339-babymen (janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen zańsyz aınalysý jáne uıymdasqan qylmystyq topqa qatysý) taǵylǵan aıyptan olardyń áreketinde qylmystyń quramy joq bolýyna baılanysty aqtaldy.
"Sotqa deıingi tergep-tekserý organymen I.K. 2017 jyldyń tamyz aıy men 2018 jyldyń qańtar aıy aralyǵynda Atyraý oblysy aýmaǵynda bekire tuqymdas balyqtaryn jáne onyń ýyldyryǵyn zańsyz saqtaý jáne satýmen aınalysý maqsatynda quramyna Atyraý qalasynyń jáne Atyraý oblysynyń turǵyndary A.K., K.J. jáne N.T., E.S. kiretin qylmystyq topty qurǵany úshin aıyptaldy. Atyraý qalasynyń №2 sotynda qylmystyq istiń qaralýy birneshe aıǵa sozylyp, nátıjesinde sot I.K., A.K., N.T.-ǵa QK-niń 339-babymen, ıaǵnı janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen zańsyz aınalysqan degen aıyppen kelisti", dep habarlady Atyraý qalasynyń №2 sotynyń baspasóz qyzmetinen.
Aıta ketelik, qylmystyq isti qaraý nátıjesi boıynsha tergeý kezinde jiberilgen kemshilikterge Atyraý oblysy prokýrory, Atyraý oblysy mamandandyrylǵan tabıǵat qorǵaý prokýrory, Atyraý oblystyq polıtsııa departamentiniń bastyǵy, Atyraý oblystyq orman sharýashylyǵy jáne janýarlar dúnıesi aýmaqtyq ınspektsııasy basshysy, Atyraý oblysy boıynsha sot saraptama ınstıtýty dırektorynyń nazaryn aýdaryp, jekeshe qaýly shyǵaryldy.
