Atyraýda bekire tuqymdas balyqtar qyrylyp jatyr
ATYRAÝ. QazAqparat - Atyraýda bekire tuqymdas balyqtardyń óligi tirkeldi. Bul jaǵdaı Jaıyq ózenindegi balyqtardyń qyrylýymen baılanysty, dep habarlaıdy QazAqparat óńirlik kommýnıkatsııalar qyzmetine silteme jasap.
Bul týraly Atyraý oblystyq aýmaqtyq orman sharýashylyǵy jáne janýarlar dúnıesi ınspektsııasy basshysynyń orynbasary Arman Moldashev málimdedi.
Bekire tuqymdas balyqtardyń qyrylýy «Lýgovoı jylqy zaýyty» men Jaıyq-Atyraý bekire ósirý zaýytynda tirkelgen.
«Lýgovoı jylqy zaýytynda» 100-ge jýyq bekire tuqymdas balyq ólgen. 2 myńǵa jýyq balyqtyń jaǵdaıy shalajansar. Jaıyq-Atyraý bekire ósirý zaýytynda 25 baǵaly balyqtyń ólgeni anyqtaldy, 30 balyq shalajansar. Bul jaǵdaı Jaıyq ózenindegi balyqtardyń qyrylýymen baılanysty, sebebi balyq ósirý sharýashylyǵyna ózen sýy paıdalanylǵan. Qazir osy oqıǵa boıynsha qylmystyq is qozǵaldy, ekologtar men qoǵamdyq densaýlyq qorǵaý basqarmasynyń mamandary Jaıyq ózenine sý tógetin mekemelerdiń bárin tekseredi»,-deıdi Arman Moldashev.
Aıta keteıik, qazir vedomstvoaralyq komıssııa Jaıyq ózenindegi balyq óliminiń sebepterin anyqtaý ústinde. Balyq qyrylý deregi boıynsha eki qylmystyq is qozǵaldy. Sýǵa júrgizilgen zerthanalyq zertteýler Jaıyq sýynyń turǵyndar úshin qaýipsiz ekenin kórsetip otyr.
